Ռուբեն Սաղաթելյանը կազատվի զբաղեցրած պաշտոնից

«Շանսի-Նաիրիտ» համատեղ ձեռնարկության տնօրենների խորհրդի անդամ Ռուբեն Սաղաթելյանը կազատվի զբաղեցրած պաշտոնից։ Այս մասին 168.am-ի հետ զրույցում հայտնել է ՀՀ փոխվարչապետ Տիգրան Ավինյանի գրասենյակի ղեկավար, հայ-չինական «Շանսի-Նաիրիտ» համատեղ ձեռնարկության տնօրենների խորհրդի անդամ Վարագ Սիսեռյանը։ «Ռուբեն Սաղաթելյանը մեզ հետ չի համաձայնեցրել Չինաստանի քաղաքացիների՝ «Նաիրիտ Գործարան» ՓԲԸ-ի տարածք մուտք գործելը և փաստացի զբաղվել է ինքնագործունեությամբ։ Մենք դա ճշտել ենք և այս պահին ձեռնարկել ենք Ռուբեն Սաղաթելյանին «Շանսի-Նաիրիտի» տնօրենների խորհրդից հեռացնելու գործընթաց»,- ասել է Սիսեռյանը՝ նշելով, որ Սաղաթելյանը տակավին կշարունակի աշխատել «Շանսի-Նաիրիտում», բայց այդ հարցն էլ կլուծվի ապրիլի սկզբին, երբ Չինաստանում կայանալու է համատեղ ձեռնարկության խորհրդի տարեկան ժողովը, որին մասնակցելու է նաև հայկական պատվիրակությունը։ Ըստ նրա՝ Ռ.Սաղաթելյանին կփոխարինի ՀՀ կառավարության ներկայացուցիչ, որպեսզի հետայսու այսպիսի խնդիրներ չլինեն։ Քրեական գործ կամ այլ պատասխանատվության միջոց Սաղաթելյանին չի սպասում։ «Հարցն ավելի բարոյական հարթությունում է, որովհետև Սաղաթելյանն այդ այցը փաստացի համաձայնեցրել է սնանկության կառավարչի հետ, բայց դա չի նշանակում, որ ինքը չպետք է ստանար կառավարության կարծիքը կամ տեղեկացներ մեզ»,- հավելել է Սիսեռյանը։