Նորություն զինվորական ծառայությունից խուսափած անձանց համար

Խորհրդարանում ընթանում է Պաշտպանության և անվտանգության հարցերի մշտական հանձնաժողովի հերթական նիստը։ Օրակարգում ընդգրկված է «Լուսավոր Հայաստան» խմբակցության քարտուղար Գևորգ Գորգիսյանի ներկայացրած՝ «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» Հայաստանի Հանրապետության օրենքում փոփոխություն կատարելու մասին նախագիծը։ Գործող օրենքով հնարավորություն էր տրվում զինվորական ծառայությունից խուսափած այն անձանց, ում 27 տարին լրանում էր մինչ 2017 թվականի վերջ, վերադառնալ Հայաստան, վճարել համապատասխան գումարը և ազատվել քրեական հետապնդումից։ Պատգամավորն առաջարկում է, որ մինչև 2018-ի վերջ 27 տարին լրացած անձանց ևս հնարավորություն տրվի վերադառնալ Հայաստան, սահմանված ժամկետում վճարել օրենքով սահմանված դրույքաչափերին համապատասխան վճարն ու ազատվել քրեական հետապնդումից, ինչպես նաև հնարավորություն տալ նաև հունվար, փետրվար ամիսներին ծնվածներին։