Լուծումներ առաջարկող քաղաքական ուժերի դեֆիցիտ կա. խոսում են ցանկություններից, իրար վրա ցեխ են շպրտում, շշպռում, բայց լուծումներ չեն առաջարկում. Լևոն Զուրաբյան

1997 թ.-ի ղարաբաղյան հակամարտության կարգավորման փուլային տարբերակը որևէ առնչություն չունի «Խաղաղություն տարածքների դիմաց» մտացածին ֆորմուլայի հետ: Այս մասին Tert.am-ի հետ զրույցում ասաց Հայ Ազգային Կոնգրես կուսակցության փոխնախագահ Լևոն Զուրաբյանը: «Խաղաղություն տարածքների դիմաց ծրագիր գոյություն չունի առնվազն մեր գիտակցության մեջ: Երբեք հայոց դիվանագիտությունը նման պրոյեկտի մեջ չի մտել, չի քննարկել: Ինձ մնում է միայն ամոթանք հայտնել այդ պրոպագանդային, որ այդ միֆը փորձում են փաթաթել հայ ժողովրդին: 97թ.-ի փուլային տարբերակը որևէ առնչություն չունի «Խաղաղություն տարածքների դիմաց» մտացածին ֆորմուլայի հետ: Լավ է, որ Ադրբեջանի լսարանը, վերջապես, դա մեզնից լսեց: Իրականում 97թ.-ի փուլային տարբերակն ասում է, որ Ղարաբաղը Հայաստանի ու Ադրբեջանի հետ որպես իրավահավասար կողմ պետք է ստորագրի վերջնական փաստաթուղթը, և այնտեղ բոլոր ձևակերպումները նշում են Հայաստան, Ադրբեջան, Լեռնային Ղարաբաղ: Ղարաբաղը ներկայացված է որպես հակամարտության լիիրավ կողմ»,- մանրամասնեց Լևոն Զուրաբյանը: Ըստ նրա՝ քարոզչությունը միտված էր նրան, որ նսեմացվի հաղթանակը, որը տարել է հայ ժողովուրդը առաջին նախագահ Լևոն Տեր-Պետրոսյանի կառավարման օրոք: «Մի ամբողջ արշավ էլ սկսել են, որ գնում ենք փոխզիջումների, խաղաղության: Այդ մարդիկ չեն հասկանում, որ մենք զիջումների, փոխզիջումների մասին ամենաշատը խոսել ենք Քելբաջարի գործողություններից առաջ: Փոխզիջումներ մերժելով քաղաքականություն չեն տանում, ոչ մի արդյունքի չեն հասնում»,- շեշտեց Լևոն Զուրաբյանը: Ինչ վերաբերում է ՀԱԿ հնչեցրած առաջարկություններին, կուսակցության փոխնախագահն ասաց, որ իրենք դժգոհություն են հայտնում և լուծումներ առաջարկում: «Հարցեր կան, որոնց մենք չենք կարող ընդդիմանալ: «Մարտի 1»-ի բացահայտման գործում մենք չենք կարող լինել ընդդիմություն այս իշխանությանը: «Կոնգրեսն» է պայքարել զոհերի ծնողներին փոխհատուցելու և այլնի համար: Երբ վարչապետը գնում է այդ քայլերին, մենք կարո՞ղ ենք այլ բան անել, քան ողջունել, կոչ անել մասնակցել այդ պրոցեսին, որի կարևոր տարրերից է լինելու մարտի 1-ին տեղի ունենալիք հանրահավաք-երթը»,- ասաց Զուրաբյանը: Նա ասաց, որ ՀԱԿ-ը «պետության շահերով մտահոգված ընդդիմություն է, ընդդիմություն, որը լուծումներ է առաջարկում», իսկ «լուծումներ առաջարկող քաղաքական ուժերի դեֆիցիտ կա, բոլորը խոսում են ցանկությունների մասին, իրար վրա ցեխ են շպրտում, շշպռում են, իրար դեմ «լայքեր» են դնում, բայց չեն խոսում, թե երկիրը ինչ քայլերով է պետք տանել դեպի զարգացման»: