«Ռեկետի մեթոդներ». տնտեսվարողը բարձրաձայնում է, ՊԵԿ նախագահը՝ արձագանքում. lurer.com

«Հալդի.կո» սրճարանն իր ֆեյսբուքյան էջում հանդես է եկել հայտարարությամբ՝ հարկային մարմիններին մեղադրելով ռեկետի մեթոդներով գործելու մեջ, քանի որ իրենց կանչել և ասել են՝ անհրաժեշտ է մտածել պետության մասին և ավելացնել հարկային մուտքերը: «Ուզում ենք հատուկ նշել, որ մեր գործունեության ամբողջ ընթացքում մենք եղել ենք բարեխիղճ հարկատու՝ միշտ խփել ենք ՀԴՄ-ները և բոլոր աշխատողները գրանցված են եղել: Վերջը՝ ներկայացվեց պահանջ, որպեսզի մենք գոնե ՀԴՄ-ի մեջ ներառենք 10%-անոց սպասարկման վճար, հակառակ դեպքում՝ ասացին՝ «ամեն օր ձեր աշխատողներին կկանչենք մեզ մոտ զրույցի, դուք աշխատող չեք ունենա և կստեղծենք այլ խոչնդոտներ ձեր աշխատանքի համար»: Այդ դեպքում 800 դրամանոց սուրճը ավտոմատ կդառնա 880 դրամ և ամենավատը այն է, որ այդ թանկացումը չունի ոչ մի տնտեսական հիմնավորում և այդ տարբերությունը վճարելու եք դուք: Ամենազայրացնող փաստն այն է, որ մեր հարկային մարմինները գործում են «ռեկետի մեթոդներով»: Չէ՞ որ սա սիստեմային խնդիր է»,- գրված է «Հալդի.կո»-ի ֆեյսբուքյան էջում: Հայտարարությունը բուռն արձագանք ստացավ. արձագանքեցին ՊԵԿ-ից, Հայկական ռեստորանների միությունից, պատգամավորներ և շարքային քաղաքացիներ, ովքեր մեկնաբանություններում սկսեցին պահանջել անուններ ներկայացնել, որպեսզի կարողանան խնդրին լուծում տալ: Ի դեպ, գրառմանն անմիջապես արձագանքեց նաև Պետական եկամուտների կոմիտեի նախագահ Դավիթ Անանյանը. «Բացահայտեք հարկային տեսուչների անունները, որպեսզի արժանի պատիժ ստանան, այլապես Ձեր ասածը կընկալվի որպես զրպարտություն»,- գրել է նա: Թեմայից զատ, պարզվում է, որ ռեստորան-սրճարանը աշխատացրել է մարդկանց, բայց չի վճարել: Համենայն դեպս, մեկնաբանություններում ակտիվ մեղադրանքներ էին հնչեցվում «Հալդի.կո»-ի հասցեին՝ աշխատողների աշխատավարձերը չվճարելու համար: Նկատենք, որ Հալդի.կո-ն ոչ միայն անուններ չտվեց, այլև անգամ չարձագանքեց ՊԵԿ նախագահի գրառմանը: Այս անգամ ռեստորան-սրճարանին սկսեցին մեղադրել փաստերից խոսելու ու առանց փաստերի հայտարարություն անելու մեջ: «Հալդի.կո»-ն, անդրադառնալով մեղադրանքներին՝ դրանք որակեց անհիմն ու ապատեղեկատվություն. «Եթե կան այդպիսի փաստեր, խնդրում ենք դիմել համապատասխան մարմիններին՝ հետաքննություն անցկացնելու նպատակով և չշեղել մեր գրառումի բուն թեման որը վերաբերվում է ՊԵԿ-ի աշխատելավոճին: Եթե հարկային մարմինները ունեն հիմնավոր կասկած տնտեսվարողի ոչ բարեխիղճ աշխատանքի մեջ, անհրաժեշտ է անցկացնել հետաքննում և կասկածների հաստատման դեպքում կանչել կոնկրետ տնտեսվարողին պատասխանատվության օրենքի շրջանակներում»: Այս գրառումը ևս օգտատերերի կողմից անպատասխան չմնաց, այս անգամ մեկնաբանեցին՝ եթե ստուգումներ անցկացվեն, շատ այլ բաներ կբացահայտվեն: Ստեղծված իրավիճակի շուրջ պարզաբանումներ ստանալու համար ԼՈւՐԵՐ.com-ը զրուցեց «Հալդի.կո»-ի իրավաբան-խորհրդատու Տիգրան Հակոբյանի հետ: Վերջինս վստահեցրեց, որ իրենք անձնական նամակներով կապ են հաստատել թե՛ ՊԵԿ-ի, թե՛ պատգամավորների, և թե՛ այլ շահագրգիռ անձանց հետ, նրանց ուղարկել են համապատասխան փաստաթղթեր: Իսկ թե ֆեյսբուքում ինչո՞ւ փաստեր չէին ներկայացնում՝ այսպես պատասխանեց. «Դրանք անձնական տվյալներ են, որոնք իրավունք չունենք հրապարակելու ֆեյսբուքում: Մենք ՊԵԿ-ին ներկայացրինք անունները, մեզ փոխանցեցին, որ հարկային աշխատողները ինքնակամ են նման բան արել, իրենց կպատժեն և կբացատրեն, թե ինչպես պետք է աշխատել»,- նշեց նա: Անդրադառնալով նաև աշխատողների աշխատավարձերը չվճարելու հայտարարություններին՝ «Հալդի.կո»-ի իրավաբան-խորհրդատուն ասաց, թե դրանք ֆեյք օգտատերի կողմից արված գրառումներ են: