Դա մեծ խնդիր է. վարչապետ

«Իմ քայլը հանուն Լոռու մարզի» գործարար ֆորումի ժամանակ, ի պատասխան Լարսով արտահանման խնդիրների մասին հարցին, վարչապետ Փաշինյանը նշել է, որ բանակցությունների վերջին վուլը մեկ շաբաթ առաջ է տեղի ունեցել: «Բանակցությունների վերջին ռաունդը՝ Շվեյցարիա, Ռուսաստան, Վրաստան, մեկ շաբաթ առաջ տեղի ունեցավ, եթե շատ անկեղծ լինեմ՝ գիտեք, որ այդ համաձայնագիրը 2011 թվականին է ստորագրվել, դա նոր բան չէ, այսինքն՝ արդեն 8 տարի բանակցություններն ընթանում են: Ճիշտն ասած, դա հարց է, որ քաղաքական նրբերանգներ ունի, ես շատ հույս չէի դնի դրա վրա: ՌԴ մեր գործընկերները պլանավորում են, որ Լարսի ռուսական հատվածն ընդլայնեն, և այնտեղ թողունակությոնը համապատասխանեցվի վրացական հատվածին: Հիմա մեր մտահոգությունն այն է՝ այդ շինարարական աշխատանքները հնարավորինս թեթև սեզոնին արվեն, որպեսզի չազդեն մեր բեռների արտահանման վրա: Դա մեծ խնդիր է: Խնդիր կա նաև երկաթուղային ու լաստանավային փոխադրումների ինքնարժեքն ընդունելի դարձնել՝ հատկապես այն ապրանքների համար, որոնք փչանալու խնդիր չունեն: Այնպես որ, այս թեման մենք բարձրացնում ենք և մշտական կապի մեջ ենք Շվեյցարիայի, ՌԴ և Վրաստանի գործըներների հետ: Իրենք շատ լավատեսական ազդակներ են ուղարկում, բայց ռուսական ասացվածք կա «надейся на лучшее, готовься к худшему», այնպես որ ավելի լավ է՝ մենք հավելյալ սպասումներ չունենանք, և մեր գործունեությունն իրականացնենք այս տրամաբանության մեջ»,- բացատրել է Նիկոլ Փաշինյանը: