Ռուսները հասկացնում են՝ մեզ համար չեք արել, ձեզ համար եք արել, շնորհակալություն չսպասեք

ՀՀ-ում ՌԴ դեսպանատանը՝ Հայրենիքի պաշտպանի օրվա կապակցությամբ հրավիրված ընդունելությանը, ՀՀ Պաշտպանության նախարար Դավիթ Տոնոյանն անդրադարձել է Սիրիա ՀՀ փորձագետների հումանիտար օգնության խումբ ուղարկելուն, ՀՀ-ում ռուս սահմանապահների դերի կարևորությանը: «Հայաստանում ՌԴ անվտանգության դաշնային ծառայության սահմանապահ զորքերը շարունակում են իրենց առջև դրված խնդիրները պատշաճ լուծել», ասել է նա: ՀՀ տարածքում գտնվող ռուսական 102-րդ ռազմաբազայի անձնակազմը բազմիցս հաստատել է իր առջև դրված խնդիրները լուծելու իր բարեխիղճ մոտեցումն ու բարձր ռազմական պատրաստվածությունը, հավելել է Դավիթ Տոնոյանը: «Մեկ անգամ չէ, որ ասել եմ՝ ռուսական ներկայությունը հավաքական անվտանգության կովկասյան տարածաշրջանում կարևոր զսպող գործոն է հանդիսանում ռազմական գործողությունների հավանական վերսկսման համար և նպաստում է տարածաշրջանում անվտանգության և իրավիճակի կայունությանը», - ասաց Տոնոյանը: Այս կոնտեքստում նա կարևորել է երկկողմանի միջպետական համաձայնագրերի կյանքի կոչումը՝ Հավաքական անվտանգության կովկասյան տարածաշրջանում միասնական պաշտպանական համակարգ ստեղծելուն և ՀՀ-ՌԴ Զինված ուժերի միասնական զորախմբին: Հայ-ռուսական հարաբերություններին անդրադարձել է նաև ՀՀ-ում ՌԴ դեսպանը: Այս օրը ոչ միայն Ռուսաստանինն է, այլ մեր ընդհանուր պատմության մասը ու մեր երկուսի տոնը, ՌԴ դեսպանատանը Հայրենիքի պաշտպանի օրվա կապակցությամբ հրավիրված ընդունելությանն ասել է Հայաստանում ՌԴ դեսպան Սերգեյ Կոպիրկին: «Պետությունները հիմնվում են իրենց ամուր զինված ուժերի վրա, որով համարվում են նրա ազատության և անկախության երաշխավորները, բայց ժամանակակից աշխարհում կարևոր է մշտապես ունենալ դաշնակից պետությունների օժանդակությունը: Միայն դաշնակիցների միջև ուժեղ և տևական կապերի շնորհիվ է հնարավոր լինում միասնական լուծել միջազգային հանրության առջև ծառացած կարևորագույն խնդիրները՝ ապահովելով խաղաղություն և անվտանգություն ինչպես աշխարհում, այնպես էլ տարածաշրջանում», - նշել է նա: Դեսպանն ընդգծել է, որ այսօր ՀՀ-ՌԴ ռազմական համագործակցությունը ավելի է զարգանում: «Ռուսական բանակը, որն արդարացիորեն համարվում է աշխարհում ուժեղագույններից մեկը, Հայաստանի հետ կիսվում է տարիների ընթացքում հավաքած փորձով, համագործակցում է երկկողմանի պրոեկտներում: Մենք բարձր ենք գնահատում ՀՀ մասնակցությունը Սիրիայի հումանիտար օգնությանը: Հայ փորձագետների ներկայությունը Սիրիայում ևս մեկ անգամ հաստատում է մեր դաշնակցային հատուկ հարաբերությունները», հավելել է դեսպանը: Հայ-ռուսական հարաբերությունների մասին, իհարկե, ՀՀ-ում Ռուսաստանի դեսպանը պետք է հնարավորինս դրական լույսի ներքո ներկայացնի: Թեև Հայաստան-Ռուսաստանում ամեն ինչ այնքան էլ հարթ չէ, բայց դեսպանը, կարծես փորձում է «փրկել» դրությունը՝ հիշեցնելով որոշ կարևոր հանգամանքներ: Բայց ռուսներն արդեն սկսել են այսպիսի տոնայնությամբ ներկայացնել Սիրիա՝ հայկական խմբի գործողումը՝ «ձեզ համար եք արել, մեզ համար չեք արել...», հետևաբար՝ շնորհակալություն չսպասեք Մոսկվայից: Ռուսաստանի Դաշնային խորհրդի անդամ Իգոր Մորոզովն էլ օրինակ, մեկ այլ ուշագրավ դրվագ է հիշեցրել: «Դա ՌԴ-ին ուղղված աջակցություն չէ, թեև մեզ համար կարևոր է, որ մեր ՀԱՊԿ-ի և ԱՊՀ-ի գործընկերները սատարում են մեր նախաձեռնությունները, դա օգնություն էր Սիրիայի ժողովրդին, սիրիական պետականությանը», «Sputnik Արմենիա» մամուլի կենտրոնում ասել է Իգոր Մորոզովը`«Հայաստանի զինծառայողները Սիրիայում. Հայացք Մոսկվայից» տեսակամրջի ժամանակ: Բանախոսն անգամ ինչ-որ ընդհանրություններ է տեսնում Սիրիա`ռուսական զորախումբ ուղարկելու և 1979-ի հետ, երբ ԽՍՀՄ զորքերը, միջազգային նորմերի հիման վրա, կանգնեցին Աֆղանստան պետության կողքին: Իգոր Մորոզովը հումորով է վերաբերվում այն խոսակցություններին, որ ՀՀ-ն Սիրիա զորախումբ է ուղարկել ՌԴ-ի պահանջով: «Ամեն պետություն իր ազգային-պետական շահերով է առաջնորդվում: Հայաստանը մեծ սփյուռք ունի Սիրիայում: Դա անգամ ուշացած քայլ է, դա ավելի շուտ պետք էր անել, 1915-ին, ցեղասպանությունից հետո Սիրիան ընդունեց հայերին, դուք պարտք եք սիրիացիների: Դա դուք եք որոշել, ՀՀ սուվերեն կառավարությունն է ուղարկել մարդասիրական զորախումբը: Անգամ, եթե Շոյգուն է կոչով դիմել գործընկերներին, որոշումը կայացրել է Հայաստանի ինքնիշխան կառավարությունը»,- ասել է նա`«մեծ գործ» անվանելով այն, որ Հայաստանը միացավ ՌԴ-ի կոչին և մարդասիրական առաքելություն ուղարկեց Սիրիա: Մետաքսյա Շալունց