Գագիկ Խաչատրյանին ԱԱԾ հրավիրելու պահը չի հասունացել. Արթուր Վանեցյան
ԱԱԾ պետ Արթուր Վանեցյանն այսօր կառավարությունում ,անդրադառնալով Գագիկ Խաչատրյանին ԱԱԾ հրավիրելու մասին լուրերին՝ չհերքեց հետագայում նրան ԱԱԾ հրավիրելու հավանականությունը.«Գագիկ Խաչատրյանին ԱԱԾ չենք հրավիրել: Եթե ես ասեմ, որ այդ ուղղությամբ աշխատանքներ չենք իրականացնում, կստեմ: Այո՛, իրականացվում են, բայց չի հասունացել պահը, որ լինեն քննչական գործողություններ, որ հրավիրեն ԱԱԾ, ամեն ինչ կա, ուղղակի շատ լուրջ և ծավալուն աշխատանք է»: Ավելին, նա նշեց, որ իրենց տիրույթում գտնվող ցանկացած գործի վերաբերյալ թույլ հիմքեր չունեն, ու չի եղել դեպք, որ իրենց կասկածները չհիմնավորվեն: «Եթե մի գործ հարուցում ենք, քննում ենք, երբեք չի եղել, որ մեր սկզբնական տվյալները չհաստատվեն, ինչի մասին հայտարարում ենք, ստանում են 100 տոկոսանոց ապացույց: Երբ հասնում է դատարան, ընդունվում են դատաքննության բոլոր կողմերի կողմից, կարող է թվա, թե դանդաղ ենք գործում, ու տպավորություն ստացվի, որ հասարակությունը ավելի շատ տեղեկություն ունի կոռուպցիոն դեպքերի մասին, բայց կարևոր հանգամանք կա՝ մենք պետք է առաջնորդվենք օրենքներով, 100 տոկոսանոց ապացույցներով, պետք է լինեն հիմքերը, որով կարող ենք մարդուն մեղադրանք առաջադրել ու ուղարկել դատարան, օդում կախված լուրերը մեզ չեն վերաբերում»,- մանրամասնեց նա:
Հետևեք մեզ Viber-ում
