«Բելառուսում կարող է կրկնվել Ուկրաինայի սցենարը». Ռասմուսեն
ՆԱՏՕ-ի նախկին գլխավոր քարտուղար Անդերս Ֆոգ Ռասմուսենը (2009-2014թթ.) LIGA.net-ի հետ զրույցում հայտարարել է, որ Բելառուսում կարող է կրկնվել Ուկրաինայի սցենարը՝ կապված «պատերազմի ու բռնակցման» հետ: « Ռուսաստանը մոտենում է արևմտյան սահմաններին:Լուրջ ռիսկ կա առ այն, որ Բելառուսում կկրկնվի ուկրաինական սցենարը՝ պատերազմով ու բռնակցմամբ: Այդ երկրին նման սցենար է սպասվում, եթե այն չսկսի բարեփոխվել: Խորհուրդ եմ տալիս բելառուս ազգին ու երկրի ղեկավարությանը պաշտպանվել ռուսների ագրեսիայից: Պետք է սկսել դեպի ժողովրդավարություն և ազատություն տանող բարեփոխումներ: Միայն նման բաները կարող են ռուսական ագրեսիայից պաշտպանություն ստեղծել»,-ասել է ՆԱՏՕ-ի նախկին ղեկավարը: Նա նաև հիշեցրել է ՌԴ նախագահ Վլադիմիր Պուտինի հայտարարությունն առ այն, որ «Բելառուսը, ինչպես և Ղրիմի թերակղզին, պետք է ներառվեն ռուսական մեծ պետությունում»: Միևնույն ժամանակ Ռասմուսենը նկատել է, որ Լուկաշենկոն չի ցանկանում բարեփոխումների ճանապարհով գնալ, բայց նաև չի ցանկանում Պուտինի լծի տակ ապրել: «Նա պետք է ընտրություն կատարի՝ կա՛մ բարեփոխումներ, կա՛մ ռուսական մշտական լուծ»,-եզրափակել է Ռասմուսենը:
Հետևեք մեզ Viber-ում
