Կեղծ հեռախոսագիր` դատարանի փաստաթղթերում. ՀՔԾ-ի փորձությունը

«Մարտի 1»-ի քրեական գործով քննչական խմբի նախկին ղեկավար Վահագն Հարությունյանի պաշտպան Միհրան Պողոսյանը հաղորդում է ներկայացրել ՀՔԾ` Վ.Հարությունյանի նկատմամբ խափանման միջոցի քննարկման ժամանակ դատարանի կողմից թույլ տրված կեղծիքի համար: Ավելի վաղ «Փաստինֆո»-ն տեղեկացրել է, որ Երևան քաղաքի ընդհանուր իրավասության դատարանը 2018թ-ի դեկտեմբերի 30-ին` դատավոր Արտուշ Գաբրիելյանի նախագահությամբ, քննության առարկա է դարձրել «Մարտի 1»-ի քրեական գործով քննչական խմբի նախկին ղեկավար Վահագն Հարությունյանի նկատմամբ որպես խափանման միջոց կալանավորումը կիրառելու վերաբերյալ ՀՔԾ քննիչի միջնորդությունը եւ բավարարել այն` առանց պաշտպանական կողմի մասնակցության: Երևան քաղաքի ընդհանուր իրավասության դատարանի նշված որոշման դեմ ներկայացված վերաքննիչ բողոքի քննարկման ժամանակ փաստաբանը կեղծ փաստաթուղթ է հայտնաբերել` «ՀԵՌԱԽՈՍԱԳԻՐ» վերտառությամբ: Ըստ նշված հեռախոսագրի` դեկտեմբերի 30-ին` ժամը 11։25-ին (միջնորդությունը դատավորին մակագրվելուց 11 րոպե անց), Դատարանի աշխատակազմը փորձել է կապ հաստատել Վահագն Հարությունյանի պաշտպանի հետ և տեղեկացնել, որ դատական նիստը նշանակված է նույն օրը ժամը 13։00-ին, սակայն  Միհրան Պողոսյանը հեռախոսազանգերին չի պատասխանել։ Վերջինս պնդում է, որ ինքն այդ օրը հեռախոսազանգ չի ստացել եւ պատրաստակամ  է ներկայացնել դա վկայող փաստաթղթեր: Նա համոզված է, որ այդպիսի հեռախոսազանգ ոչ միայն չի կատարվել, այլեւ հետագայում է  որպես կեղծ ապացույց զետեղվել վարույթի նյութերում, քանի որ  այն չի եղել, երբ  10.01.2019թ.  ծանոթացել է նյութերին: Փաստաբանի պնդմամբ` վարույթի նյութերում կեղծ հեռախոսագրի առկայությունն իր մեջ հանցագործության հատկանիշներ է պարունակում` ակնկալելով, որ ՀՔԾ-ն քրգործ կհարուցի եւ կպարզի կեղծիքի հեղինակին: Ինչպես «Փաստինֆո»-ն արդեն տեղեկացրել է` վերաքննիչ քրեական դատարանը բավարարել է փաստաբանի բողոքը եւ բեկանել Վահագն Հարությունյանին կալանավորելու վերաբերյալ  Երեւանի ընդհանուր իրավասության դատարանի 30.12.18 թ. որոշումը: Բացի այդ`  Դատավորների ընդհանուր ժողովի կարգապահական հարցերի հանձնաժողովը՝ փաստաբան Պողոսյանի հաղորդման հիման վրա, որոշել է կարգապահական վարույթ հարուցել  Երևանի ընդհանուր իրավասության դատարանի դատավոր Արտուշ Գաբրիելյանի նկատմամբ առանց պաշտպանական կողմի մասնակցության դատական նիստն անցկացնելու համար: