Ոստիկանության բարձրաստիճան պաշտոնյայի նկատմամբ դատարանը գրավ է կիրառել

Երևան քաղաքի ընդհանուր իրավասության դատարանը՝ դատավոր Արտուշ Գաբրիելյանի նախագահությամբ, 2019 թվականի փետրվարի 13-ին գրավ է կիրառել ՀՀ ոստիկանության Լոռու մարզային վարչության Ստեփանավանի բաժնի պետի ծառայության գծով տեղակալ Նարեկ Խաչատրյանի նկատմամբ: Նշենք, որ վերջինիս պաշտպանն է փաստաբան Ամրամ Մակինյանը: «Փաստինֆո»-իհաղորդմամբ` դատարանը, բավարարելով փաստաբանի միջնորդությունը, որպես գրավի չափ սահմանել է  700.000 ՀՀ դրամը: Ավելի վաղ տեղեկացրել ենք, որ Նարեկ Խաչատրյանին 2018 թ. դեկտեմբերին մեղադրանք է առաջադրվել ՀՀ քրեական օրենսգրքի 311-րդ հոդվածի 2-րդ մասով` 150 հազար դրամ կաշառք ստանալու համար: Ըստ նախաքննական մարմնի` նա զբաղեցնելով ՀՀ ոստիկանության Լոռու մարզային վարչության Ստեփանավանի բաժնի պետի ծառայության գծով տեղակալի պաշտոնը, 2018 թվականի հուլիս-հոկտեմբեր ամիսներին «Հայանտառ» ՊՈԱԿ-ի «Գյուլագարակ անտառտնտեսություն» մասնաճյուղի անտառապետ Նարեկ Թորոսյանի միջոցով ապօրինի ծառահատումներ իրականացնող ու փայտանյութ  ապօրինի դուրսբերող մի շարք անձանցից  Լոռու մարզի Գյուլագարակ գյուղում ստացել է ընդհանուր առմամբ 150.000 ՀՀ դրամ կաշառք` նրանց չխոչընդոտելու համար: Փաստաբանը գրավի միջնորդությամբ հիմնավորել էր, որ  իր պաշտպանյալը, մնալով ազատութրան մեջ, չի խոչընդոտի գործի քննությանը: Նշենք, որ նախկինում  Վերաքննիչ դատարանը որպես Նարեկ Խաչատրյանիկալանավորման հիմք դիտարկել էր միայն այն, որ նա մնալով ազատության մեջ կարող է խոչընդոտել մինչդատական վարույթում գործի քննությանը` ազդելով նրա ենթակայության տակ գտնված ծառայակիցների վրա, ովքեր դեռեւս չեն հարցաքննվել: Նկատի ունենալով, որ նախաքննական մարմինն արդեն իսկ հարցաքննել է Նարեկ Խաչատրյանի ենթակայությամբ գտնված ծառայակիցներին` փաստաբանը փաստել է, որ այդպիսով վերացել է թեկուզ և վերացական այն վարկածը, որ նա  տեսականորեն կարող է ազդեցություն գործադրել նրանց ցուցմունքների վրա:  Դատարանը հիմնավորված է համարել փաստաբանի փաստարկները եւ գրավի կիրառումը թույլատրելի համարել: