Իտալիայի դեսպանն ՝ ի պատիվ Կոնստանտին Օրբելյանի
Իտալիայի դեսպան պարոն Վինչենցո Դել Մոնակոն բարձր է գնահատում հայկական մշակույթը, հաճախ է լինում Օպերայի և բալետի ազգային ակադեմիական թատրոնում։ Բարձր է գնահատում նաև մարդկանց, ովքեր զարգացնում ու տարածում են մշակույթը, աշխարհի հետ փոխհարաբերվում արվեստի լեզվով։ Իտալացի դիվանագետի համար Օպերայի և բալետի ազգային ակադեմիական թատրոնի ղեկավար Կոնստանտին Օրբելյանը նույնպես դեսպան է՝ մշակութային դեսպան, որի գործունեությունը նույնքան կարևոր է, որքան դիվանագետինը։ Փետրվարի 15-ի երեկոյան իր նստավայրում դեսպան Դել Մոնակոն կազմակերպել էր ընդունելություն՝ ի պատիվ Օրբելյանի։ Նա ուզում էր ըստ արժանվույն գնահատել հայ դիրիժորին «Գրեմմի» հեղինակավոր մրցանակաբաշխությանը առաջադրվելու առիթով։ Հիշեցնենք, որ «Գրեմմի» մրցանակաբաշխության «Լավագույն օպերային ձայնագրություն» անվանակարգում այս տարի առաջադրված էր նաև Վերդիի «Ռիգոլետո» օպերայի ձայնագրությունը՝ Կոնստանտին Օրբելյանի ղեկավարությամբ և համաշխարհային օպերային աստղ, լուսահոգի Դմիտրի Խվորոստովսկու կատարմամբ, սակայն այդ անվանակարգում հաղթեց «Սթիվ Ջոբսի հեղափոխությունը» ձայնագրությունը: Իտալիայի դեսպանատանը Օրբելյանի պատվին կազմակերպված երեկոյին մասնակցում էին հիմնականում մշակույթի գործիչներ։ Երեկոն մշակութային էր, անկեղծ ու ջերմ շնորհիվ նաև դեսպանի կնոջ՝ տիկին Դայան Ռիսոպուլոս Դել Մոնակոյի։ Վերջինս հասցրել է դառնալ Երևանի Օպերային թատրոնի բարեկամը և աջակցում է թատրոնի զարգացմանը։ Երեկոյի բացման ժամանակ դեսպանն իր խոսքում մի կարևոր միտք ասաց․ «Բոլորս մեր սրտում ունենք մոգական անունների ցանկ։ Իմ ցանկի ամենավերևի անուններում, օրինակ, իմ կնոջ անունն է։ Ես վստահ եմ, որ այդ մոգական անունների ցանկի ամենավերևում Ձեզ համար նաև Հայաստան անունն է»։ Անկախ-ի հետ զրույցում դեսպանն ասաց, որ շատ է սիրում Հայաստանը, բարձր է գնահատում հայկական մշակույթն ու հյուրընկալությունը, հասցնում է ակտիվ կյանքով ապրել՝ մասնակցելով մշակութային միջոցառումներին, այցելելով Հայաստանի տեսարժան վայրեր։ «Երբ մեր ընկերները հարցնում են հայկական կյանքի մասին, առաջին բանը, որ նրանց ասում ենք, հետևյալն է՝ հրաշալի երկիր, առատաձեռն ու հյուրընկալ մարդիկ և կյանք՝ աշխատանքային կյանքից դուրս, որը մշակութային կյանքն է։ Դրա մեջ մենք անշուշտ նշում ենք նաև օպերան։ Աշխարհում իհարկե շատ օպերաներ կան, բայց ես անկեղծորեն պետք է ասեմ, որ իսկապես շատ ենք հավանում Երևանի օպերային թատրոնի ծրագիրը, ներկայացումները, և դա նաև Օպերային թատրոնի ղեկավարի լավ աշխատանքի արդյունքն է»,-ամփոփում է դեսպանը։
Հետևեք մեզ Viber-ում
