Անթույլատրելի է իրավական գործընթացը վերածել «կեղտ բռնելու» գործընթացի. Սեյրան Օհանյանը՝ «Մարտի 1»-ի գործի, իրեն, Խաչատուրովին, Ռ. Քոչարյանին առաջադրված մեղադրանքների մասին (տեսանյութ)
ՀՀ պաշտպանության նախկին նախարար, 2008 թ.-ին Զինված ուժերի գլխավոր շտաբի պետ Սեյրան Օհանյանը տեսաուղերձի միջոցով անդրադարձել է մարտի 1-2 իրադարձությունների ժամանակ բանակի հետ կապված քննարկումներին, ինչպես նաև թիվ 0038 գաղտնի հրամանին: Սեյրան Օհանյանը նշում է, որ 0038 հրամանը ներքին գերատեսչական հրաման է, և այն դնել մարտի 1-ի իրադարձությունների, ողբերգությունների հիմքում ծայրահեղական մոտեցում է և ոչ օբյեկտիվ: Նա ասում է, որ որևէ մեկն իրավունք չունի զորքի զորանոցային վիճակի բերելը մեկնաբանել որպես հակասահմանադրական քայլ ժողովրդի դեմ: Տեսաուղերձում Սեյրան Օհանյանը նկատում է, որ մարտի 2-ին եթեր տրված տեքստը, որ ինքը կարդացել է, նպատակ ուներ կանխարգելել հնարավոր սադրանքները բանակի և ժողովրդի միջև: «Անցել է 10 տարի, ես այս ընթացքում այդ տեքստի մասով որևէ իրավական գործընթացով չեմ անցել, փաստահավաք խումբը հարցեր չի տվել, տուժածներ չեն եղել այդ տեքստի բովանդակությունից, անթույլատրելի է իրավական գործընթացը վերածել «կեղտ բռնելու» գործընթացի: Դա պրիմիտիվ է և ինձ հիշեցնում է «Աբու Հասանի մաշիկները» հեքիաթը, երբ մեղադրվեցին ի վերջո մաշիկները: Ինձ համար զավեշտական են տեքստին վերագրվող մեղադրանքները, իսկ ինչ վերաբերում է ինձ, դեմքի որևէ արտահայտությամբ, ժեստիկուլյացիայով որևէ սպառնալիք չեմ արտահայտել: Տեքստը կազմվել է համապատասխան մասնագետների կողմից»: Նա հավելում է, որ չի ընդունում իրեն առաջադրված մեղադրանքը, ինչպես նաև հետապնդումները նախկին գործընկերների նկատմամբ, ինչպես նաև ՀԱՊԿ նախկին գլխավոր քարտուղար Յուրի Խաչատուրովի նկատմամբ մեղադրանքը:
Հետևեք մեզ Viber-ում
