Ներքին ընտանեկան հարց էր. Մարության
Երեկ առավոտյան ավտոբուսների վարորդները գործադուլ չեն իրականացրել։ Այս մասին այսօր՝ փետրվարի 15–ին լրագրողների հետ ճեպազրույցում ասաց Երևանի քաղաքապետ Հայկ Մարությանը՝ անդրադառնալով երեկ առավոտյան Երևանում երթևեկության կաթվածահար լինելու պատճառներին։ «Դա գործադուլ չէր, մեր քաղաքապետարանի ներքին ընտանեկան հարց էր։ Քաղաքապետարանն իր ՓԲԸ–ներով մեծ ընտանիք է, և ընտանիքում լինում են տարաբնույթ խոսակցություններ»,–ասաց նա։ Մարությանը նշեց, որ «Երևանի ավտոբուս» ՓԲԸ–ի տնօրենը վաղուց էր աշխատանքից ազատման դիմումներ կայացրել։ «Երևանի ավտոբուս» ՓԲԸ–ն ունի 70 չշահագործվող ավտոբուս և մենք պլանավորում ենք մտցնել շահագործման՝ ի նպաստ մեր բնակիչների: Ավտոբուսների շահագործումը կիրականացվի ավտոբուսների ցանցի փոփոխությունից հետո»,–ասաց նա:
Հետևեք մեզ Viber-ում
