Տեղի ունեցավ շատ լուրջ գաղափարական բանավեճ ու լուրջ գաղափարական բախում. վարչապետի ամփոփիչ ելույթը

Ազգային ժողովում քիչ առաջ ավարտվեց կառավարության ծրագրի նախագծի քննարկումը, ավարտվեցին պատգամավորների ելույթները։ Վարչապետ Նիկոլ Փաշինյանը սկսեց իր եզրափակիչ ելույթը։ «Ես ուզում եմ ասել, միանշանակ, որ եթե իմ խոսքում որեւէ մեկը մուննաթ կամ հեգնանք է զգացել, ես ներողություն եմ խնդրում, եւ համարում եմ, որ նման հարաբերությունները նոր Հայաստանում տեղ չունեն, եւ կարծում եմ, որ դա սխալ մեկնաբանության արդյունք է, որովհետեւ ես սիրում եմ իմ խոսքը կառուցել ամբողջական, լիարժեք եւ լիաթոք, եւ եթե այսօրվա իմ խոսքում եւ հետագայում ինչ-որ մեկը նման տպավորություն կստանա, թե ես ինչ-որ մեկի վրա մուննաթ եմ գալիս կամ հեգնում, միանգամից ասում եմ, որ դա սխալ տպավորություն է: Ուզում եմ հիշեցնել, որ երկար տարիներ սա նույնպես մեր երկրի անլուծելի թվացող հարցերի շարքում է եղել, եւ կարող ենք ասել, որ այս խնդիրը լուծված է եւ մենք ունենք նոր որակի խորհրդարան՝ այն պարագայում, երբ ես, շատ ներկաների ճանաչելով, կարող եմ ասել, որ այստեղ արտահայտվել է հնարավոր ինտելեկտուալ պոտենցիալի միայն մի փոքր մասը, եւ ես համոզված եմ, որ այդ պոտենցիալը նոր դրսեւորումներ կունենա եւ մեր նոր օրենդրության մեջ նոր որակ կբերի»։ Փաշինյանը վերջին երեք օրվա քննարկումները համարում է խիստ հաջողված, որովհետեւ տեղի ունեցավ շատ լուրջ գաղափարական բանավեճ ու լուրջ գաղափարական բախում: