«Ճիշտ մոտեցում չէ հեղափոխությունն անընդհատ մարդկանց երեսով տալ». Մարուքյան
Ազգային ժողովում կառավարության ծրագրի քննարկման ժամանակ ԼՀԿ խմբակցության ղեկավար Էդմոն Մարուքյանը նշել է, որ Կառավարության ծրագրի քննարկումն ընթանում է որոշակի անհանդուրժողականության մթնոլորտում: Նա ասաց, որ երբ ասվում է, որ աղքատությունը մարդկանց գլուխներում է, ինչն է պատճառը, որ դա բուռն քննադատությունների է արժանանում: «Մտովի գնում եմ 90-ականներ, այն ժամանակ միակ ու անկրկնելի մեղավորը, որ մենք աղքատ էինք, Լևոն Տեր-Պետրոսյանն էր: 2000-ականներին, երբ մենք աղքատ էինք, ես հիշում եմ, որ միակ ու անկրկնելի մեղավորը Ռոբերտ Քոչարյանն էր: Հետ գալիս եմ առաջ, մինչև 2018 թվական: Աղքատության միակ ու անկրկնելի մեղավորը Սերժ Սարգսյանն էր: Այսինքն՝ մենք այդպես ենք սովորացված, այդպիսին է մեր քաղաքական համակարգը: Գալիս է հեղափոխությունը, հեղափոխության լիդերը հայտարարում է, որ աղքատությունը մարդկանց գլուխներում է, դուք պետք է այնպես անեք, որ աղքատությունը հաղթահարեք, ձեր գուխներից հանեք այդ աղքատությունը, և տնտեսական հեղափոխություն կլինի: Բնականաբար, սրա մեջ կան կարևոր թեզեր, բայց այստեղ երկրորդ հարցն է առաջ գալիս՝ բա լավ, կառավարիչներն ինչ պետք է անեն: Այդտեղից այլ հարց է ծագում՝ բա լավ, այն ժամանակ ինչո՞ւ էին երեք առաջնորդները մեղավոր, հիմա չորրորդ առաջնորդը ասում է՝ ես մեղավոր չեմ լինելու, որ դուք շարունակելու եք լինել աղքատ: Եվ դրա համար սկսվում է խորը քննադատությունը, որովհետև մենք այդպես ենք վարժեցված, որովհետև Հայաստանի քաղաքական համակարգը միշտ այդպիսին է, մարդիկ ունեցել են անտիհերոս և հերոս»,- ասաց նա: Ըստ Մարուքյանի՝ հեղափոխությունը ավարտվել է, ճիշտ մոտեցում չէ հեղափոխությունն անընդհատ մարդկանց երեսով տալ:
Հետևեք մեզ Viber-ում
