«Ձեր նշանակած ոստիկանապետին ասում են լակոտ, ձեզնից ոչ մեկ նրան չի պաշտպանում». Արման Բաբաջանյան (video)

«Ձեր նշանակած ոստիկանապետին դատարանում ասում են լակոտ, ձեզնից ոչ մեկ նրան չի պաշտպանում, համարձակություն չի ունենում նրան զորավիգ լինել: Երեկ էլ Պաշտպանության նախարարին էին հաթաթա տալիս: Մինչև ե՞րբ»,- ԱԺ-ում հայտարարեց «Լուսավոր Հայաստան» խմբակցության պատգամավոր Արման Բաբաջանյանը՝ անդրադառնալով նախօրեին «Իմ քայլը» խմբակցության որոշ պատգամավորների ելույթներին: «...Ի՞նչ այգի, ի՞նչ այգեպան, ի՞նչ հիմն, դրոշ, երբ պետականության համար կենսական այս ինստիտուտները չենք կարողանում միասնաբար պաշտպանել»,- շարունակեց նա: Հիշեցնենք՝ Հայկ Կոնջորյանը երեկվա իր ելույթում ասել էր. «Կառավարությունը նման է այգեպանի, ով պետք է այգին մաքրի մոլախոտերից, պայքարի կրծողների և վնասակար միջատների դեմ․ դրանից հետո ծառերը պտուղներ կտան, անհավանական պտուղներ»: Այնուհետև շարունակելով նշեց. «Ռուսաստանի հետ հարաբերությունները ոչ միայն հնարավոր է և պետք է պահպանել, այլ նաև պետք է խորացնել, բայց միայն մի պարտադիր պայմանով, այն պետք է հիմնված լինի Հայաստանի արժանապատվության և ինքնիշխանության անվերապահ հարգանքի վրա» Բաբաջանյանը նշեց նաև, որ այս ծրագրով զինվորի ունղերձ են հղում առ այն, որ մեր անվտանգությունը կախված է նրա փամփշտակալի փամփուշտների քանակից: