Հիմա չհասկացա, իմ կողմի՞ց ես, թե առյուծի
Կառավարության ծրագրի չափելիության առումով խնդիրներ կան.նման հարցադրում կառավարության ծրագրի ներկայացման ժամանակ արեց Լուսավոր Հայաստան խմբակցություն պատգամավոր Արկադի Խաչատրյանը վարչապետ Նիկոլ Փաշինյանին: «Երբ մենք ասում ենք Հայաստանում 2023 թվականին ծայրահեղ աղքատություն չպետք է լինի, չափելի՞ է, թե ոչ: Ավելի կոնկրետ չի լինում: Մենք այս խնդիրը հստակ ձևակերպում ենք: Երբ աղքատության կրճատման խնդիր ենք դնում, չափելի՞ է, թե ոչ: Եթե գրեինք, որ պետք է կրճատվի 6%-ով և մեր գործունեության ընթացքում կրճատվի 5.9%-ով, ձեր խմբակցությունն ի՞նչ է անելու»,-ասաց Փաշինյանը: Այնուհետև վարչապետը Լուսավոր Հայաստանի հարցերն ու ելույթները նմանեցրեց առյուծի անեկտոդի պատմությանը: Մեկին հարցնում են՝ անապատում առյուծը հետևիցդ ընկած լինի, ի՞նչ կանես, ասում է ծառը կբարձրանամ, հակադարձում է, որ անապատում ծառ չկա, ասում է՝ սարը կբարձրանամ, պատասխանում է՝ անապատում սար չկա: Մարդն էլ վրդովված հարցնում է՝ հիմա չհասկացա, իմ կողմի՞ց ես, թե առյուծի: «Ուզու՞մ եք փոփոխությունը լինե, թե ոչ: Դուք ոչ թե վախենում եք, որ չի իրականանա կառավարության ծրագիրը, այլ որ կիրականանա: Եթե դրանից եք վախենում, ճիշտ եք անում»,- ասաց Փաշինյանը:
Հետևեք մեզ Viber-ում
