Տեր Մեսրոպը պատրաստվում է լքե՞լ Հայաստանը

Հրապարակին  տեղեկություններ են հասել, որ «Այբ» դպրոցի հոգաբարձուների խորհրդի նախագահ  Մեսրոպ քահանա Արամյանը մոտ ժամանակներս կլքի դպրոցը, դեռ ավելին՝ նա պատրաստվում է հեռանալ նաև Հայաստանից։ Մեր աղբյուրները պնդում են նաև, որ Մեսրոպ քահանա Արամյանը վաճառում է իր ունեցվածքը։ Հիշեցնենք, որ մամուլում տարածված լուրերի համաձայն ՝ նրան են պատկանում «Նոր Զովք» սուպերմարկետի ցանցից  բաժնետոմսեր։ Այս մասին ունեցած մեր տեղեկությունը «Այբ» դպրոցի հանրային կապերի պատասխանատու Նվարդ Առաքելյանը ոչ հերքեց, և ոչ էլ հաստատեց՝ ասելով, որ այդ մասին իրենք տեղեկություններ չունեն։ Դեռ ամիսներ առաջ հակամարտություն սկսվեց ԿԳ նախարար Արայիկ Հարությունյանի և Տեր Մեսրոպ քահանայի միջև։ Հարությունյանը իր ֆեյսբուքյան էջում գրել էր հետևյալը․«Շարունակում եմ համարել, որ Սերժ Սարգսյանի նախկին խորհրդական Տեր Մեսրոպը («Այբ» կրթական հիմնադրամի համահիմնադիր ու «Այբ» դպրոցի հոգաբարձուների խորհրդի նախագահը ) հանրակրթության ոլորտին ամենամեծ վնասը հասցրած մարդկանցից է»։ Նախարարի այս գրառմանը հետևեց  «Այբ»-ի մամուլի ծառայության պատասխանը, ապա «փոխհրաձգություն» սկսվեց նախարարի ու դպրոցի միջև, որին մասնակցեց նաև դպրոցի տնօրեն Արամ Փախչանյանը։ Հետագայում դպրոցում աուդիտ սկսվեց, ապա այդ աուդիտը սահուն կերպով  կոչվեց ուսումնասիրություն, իսկ հետո էլ պայմանագիր կնքեցին դպրոցի հետ՝ ասելով, որ ծրագիրը լավն է, և պետք է շարունակվի։