ՀՀ հպարտ քաղաքացին հո կենդանի չէ՞, որ էսքան բեռնել եք
hraparak.am Ողջ գիտակցական կյանքում (չհաշված Սանկտ Պետերբուրգում ուսանելու ու աշխատելու 10 տարիները) Արարատի մարզում ապրած նկարիչ Գագիկ Խաչատրյանը հռետորական հարցեր է ուղղում Հայաստանի նոր իշխանություններին․ «Հայաստանի Հանրապետության հպարտ քաղաքացին հո կենդանի չէ՞, որ էսքան բեռնել եք»։ Նկարիչը մի քանի հարց էլ ուղղում է անձամբ Արարատի մարզպետ Գարիկ Սարգսյանին։ Դրանցից մեկն այն է, թե ինչով է զբաղված նախկին գյուղապետ մարզպետը, որ մարզի 7-8 նկարիչներին, այսպես ասենք՝ մշակութային էլիտային, 8 ամսվա մեջ մեկ անգամ՝ որպես էլիտայի ներկայացուցիչների, չի կարողացել հրավիրել, որ հարցնի, թե ինչ խնդիրներ ունեն, ինչի կարիք, ինչպես կարելի է աշխուժացնել Արարատի մարզի մշակութային առօրյան։ «Ինքը հին գյուղապետ է, երեւի իրեն հասո՞ւ չէ էդ կարգի խնդիրների մեջ մտնել, մտածել, թե մշակութային ինչ խնդիրներ կարող են լինել։ Ինքը չի կարող իմանալ, մե՛նք պետք է ասենք»։ Դ
եկտեմբերի 9-ից առաջ՝ նախընտրական շրջանում, «Իմ քայլը» դաշինքի պատգամավորները քարոզարշավի էին գնացել մարզ, նկարիչը բարձրացրել է մարզի ճանապարհների հարցը, Գարիկ Սարգսյանը պատասխանել է՝ եթե հիմա որեւէ բան անենք, կդիտվի որպես ընտրակաշառք։ Գագիկ Խաչատրյանը չի համաձայնել, բայց ասել է՝ լավ, հետո արեք, ու հիմա արձանագրում է․ «Ոչինչ չարվեց, եւ ճանապարհը ոնց կար, այնպես էլ մնաց։ Ամբողջ գյուղը գազիֆիկացված է, էլ չասենք՝ Հայաստանի հեռավոր գյուղերը, իսկ դպրոցը՝ չէ։ Երեխաները, ուսուցիչները սառչում են, հոսանքից հրդեհներ են լինում։ Էդ խնդիրն էլ չեն լուծում։ Լավ, հարցնում եմ՝ արդեն շուտով մեկ տարի կլինի, որ իշխանության եք, չի՞ կարելի այդ խնդիրները կարգավորել»։ Նկարիչը Սերժ Սարգսյանի, Ռոբերտ Քոչարյանի՝ իշխանության գալուց հետո ժամանակին ինքնակամ ազատման դիմում է գրել մշակույթի նախարարության թանգարանների վարչության պետի պաշտոնից՝ չցանկանալով աշխատել հների հետ։ Հեղափոխության ժամանակ աջակցել է, ուրախացել, ընտրել «Իմ քայլին»՝ մտածելով, թե իրավիճակ է փոխվելու։ Բայց մարզում իրավիճակը տխուր է, եւ նա վարորդների անունից հարցեր է բարձրացնում, օրինակ՝ տուգանքների անհամաչափության հարցը։ Ասում է․ «Կարմիր գծերի մասին չեմ ուզում խոսել՝ խոստացան, որ պետք է վերանայեն, չարվեց։ Հիմա՝ կամերաների տուգանքների անհամաչափության հետ կապված։ Ի՞նչ է ստացվում՝ Հայաստանի Հանրապետության հպարտ քաղաքացին հո կենդանի չէ՞, որ իրեն այսպես բեռնեն»։ Վարորդները շարունակում են անհամաչափ տուգանքներ ստանալ՝ 5․000-25․000։ Նա նոր իշխանություններին հարցնում է․ «Բա ասում էիք՝ տուգանքների չափը պետք է կրճատվի, ինչ է, խաբո՞ւմ եք ժողովրդին։ Իմ դեպքում կալանքի տակ էին դրել քարտիս թոշակի բաժինը։ Եկել է 28 հազար, 60 հազար դրամ, իրենք դնում են կալանք թոշակի վրա, ի՞նչ է սա նշանակում, ձիո՞վ ման գանք»։ Գագիկ Խաչատրյանը դեմ չէ տուգանքներին, պայմանով, որ դրանք լինեն համաչափ՝ հաշվարկված Հայաստանի Հանրապետության հպարտ քաղաքացու գրպանի չափով, ու ոչ թե «գրպանը դատարկեն»։ «Բա ասում եք՝ հները թալանում էին, դուք ինչո՞ւ եք թալանում։ Ժողովրդի համար ի՞նչ նշանակություն ունի, թե ով է թալանում՝ հնե՞րը, թե՞ նորերը։ Կարծում եմ՝ ոչ մի տարբերություն»։
Հետևեք մեզ Viber-ում
