«ԱԱԾ-ն փորձելու է ինչ-որ նոր բաներ փնտրել, որը հնարավոր կլինի մեղսագրել Ռոբերտ Քոչարյանին, որպեսզի իրենց ֆիասկոն այդքան ցայտուն չերևա»
2008 թվականի մարտի 1-ի առավոտյան ոստիկանությունն ստիպված է եղել ուժ կիրառել ու ցրել ցույցը և այս զարգացման մասին ՀՀ երկրորդ նախագահ Ռոբերտ Քոչարյանը մյուս օրն առավոտյան է միայն տեղեկացել։ Այսօր Հայելի ակումբում հրավիրված ասուլիսին հայտարարեց Ռոբերտ Քոչարյանի պաշտպան Հայկ Ալումյանը: Հայկ Ալումյանը պնդեց. «Այդ օրը՝ առավոտյան լուսադեմին, ոստիկանությունը մոտեցել է այդտեղ, որպեսզի կատարի նախատեսած գործողությունը: Սակայն երբ ոստիկանական ուժերը մոտեցել են և հայտարարել իրենց նպատակների մասին, ոստիկանների ուղղությամբ քարեր են նետվել և դիմադրություն է ցուցաբերվել, և ոստիկանությունն ստիպված է եղել ուժ կիրառել, որը մինչ այդ նախատեսված չէր»,-ասաց նա: Հայկ Ալումյանը նշեց, որ անգամ վարույթ իրականացնող մարմինը՝ քննչական մարմինը, չի համարում, որ Ռոբերտ Քոչարյանը ցուցում է տվել, որ այնտեղ գտնվողների նկատմամբ ուժ կիրառվի: Հետևաբար, այդպիսի կետ նրան մեղսագրված չէ: Հայկ Ալումյանը նաև կարծիք հայտնեց, որ կան հատկանիշներ, որոնցից կարող է ենթադրել, որ «Մարտի 1-ի գործով սահմանադրական կարգի տապալման մեղադրանքը թուլանալուն զուգընթաց՝ ԱԱԾ-ն փորձելու է ինչ-որ նոր բաներ փնտրել, որը հնարավոր կլինի մեղսագրել Ռոբերտ Քոչարյանին, որպեսզի իրենց ֆիասկոն այդքան ցայտուն չերևա»:
Հետևեք մեզ Viber-ում
