Ժամանակն է Ադրբեջանի նկատմամբ միջազգային պատժամիջոցներ կիրառել. Էդուարդո Լորենցո Օչոա
Ադրբեջանական հարձակումն աննախադեպ իրավիճակ է ստեղծել: «Արմենպրես»-ի հետ զրույցում «Հայաստանի եվրոպացի բարեկամներ» կազմակերպության նախագահ Էդուարդո Լորենցո Օչոան շեշտեց, որ միջազգային իրավունքի և դրա հիմնարար սկզբունքներից մեկի՝ ուժի չկիրառման սկզբունքի նկատմամբ հարգանքի բացակայությունը հանգեցրեց հրադադարի հաստատումից հետո ռազմական լարվածության ամենածանր աճի: «Լիահույս եմ, որ միջազգային հանրության, Եվրոպական միության արձագանքը և Լեռնային Ղարաբաղի ու Հայաստանի իշխանությունների սառը դատողությունը կկանխարգելեն Եվրոպայում նոր պատերազմի մեկնարկը»,- շեշտեց Օչոան: Նրա խոսքով՝ սա ևս մեկ վկայությունն է այն բանի, որ ադրբեջանական վարչակազմը հանձնառություն չունի խաղաղ կարգավորմանը, արգելափակում է ԵԱՀԿ Մինսկի խմբի համանախագահների ցանկացած նախաձեռնություն, ինչպես օրինակ հրադադարի խախտումների վերահսկման միջազգային մեխանիզմի ստեղծումը շփման գծում, որն առաջարկվել էր դեռևս 2012թ-ին: Օչոան հիշեցրեց, որ Եվրոպական խորհրդարանն իր վերջին բանաձևերից մեկում արդեն իսկ առաջարկել էր կիրառել մի շարք պատժամիջոցներ ադրբեջանական վարչակազմի նկատմամբ: «Կարծում եմ, որ ճիշտ ժամանակն է կիրառել այդ բանաձևը: Ի վերջո, կցանկանայի իմ անկեղծ ցավակցությունները հայտնել այս ահավոր հարձակումների զոհերի ընտանիքներին»,- եզրափակեց Էդուարդո Լորենցո Օչոան:
Հետևեք մեզ Viber-ում
