«Քոչարյանի գործի նկատմամբ երկակի ստանդարտներ են կիրառվում». Հայկ Ալումյան

Երկրորդ նախագահ Ռոբերտ Քոչարյանի պաշտպաններից Հայկ Ալումյանն այսօր Հայելի ակումբում լրագրողներին տեղեկացրել է, որ բացառված է, որ պարոն Քոչարյանն ազատության մեջ մնալով՝ մի էնպիսի հանդիպում ունենա, որի մասին պետությանն անմիջապես տեղյակ չդառնա: «Այդ պայմաններում մենք ասում էինք՝ բոլոր ուրիշ հնարավոր տարբերակաների մեջ այս տարբերակում ամենաքիչն է հավանականությունը, որ անձը, մնալով ազատության մեջ, կարող է խոչընդոտել քննությանը և պետությունն այդ մասին չիմանա»,- ասել է նա: Այնուհետև անդրադառնալով փետրվարի 7-ին Վերաքննիչ քրեական դատարանի կայացրած վճռին, որով մերժվեց պաշտպանական կողմի ներկայացրած միջնորդությունը՝ Քոչարյանի խափանման միջոց կալանքը գրավով փոխարինելու վերաբերյալ, նծել է, որ 2008 թվականին սահմանադրական կարգի տապալման մեղադրանք էր առաջադրված 7 հոգու, սակայն 2009 թվականին Քրեական օրենսգրքի համապատասխան հոդվածը փոխվել է, որի արդյունքում այդ 7 հոգու նկատմամբ քրեական հետապնդումը դադարեցվել է։ «Պատճառաբանում էին, որ փոփոխված 300.1 հոդվածը վատացնում է մարդու վիճակը, հետևաբար՝ իրավունքի հանրաճանաչ սկզբունքից ելնելով՝ այդ 7 հոգին խուսափեցին պատասխանատվությունից, քրեական հետապնդումից խուսափեց նաև մեր հարգարժան վարչապետը՝ Նիկոլ Փաշինյանը։ Մեր փաստարկներից մեկն այն է, որ այդ ստանդարտը պետք է կիրառվի նաև Քոչարյանի դեմ, սակայն մեզ պատասխանեցին, որ այդ ամենն այն ժամանակվա վեց դատախազների տեսակետն է եղել։ Մեր Դատախազությունը հաշվի չի առնում, որ ըստ Սահմանադրության՝ Դատախազությունը միասնական համակարգ է։ Մարդու ճակատագիրը չի կարող կախված լինել այն բանից, թե տվյալ պահին դատարանում որ դատախազն է, անձի նկատմամբ այս աստիճանի սուբյեկտիվ մոտեցում չպետք է լինի: Այսօր պարոն Քոչարյանի գործի նկատմամբ կիրառվում են երկակի ստանդարտներ։ Կա Մուշեղ Սաղաթելյանի գործով Եվրոպական դատարանի վճիռը, և դժվարանում ենք պատկերացնել, թե ինչու են փորձում այդ վճիռն օգտագործել Ռոբերտ Քոչարյանի դեմ, քանի որ այնտեղ չկա այնպիսի բան, որը որևէ կերպ կարող է ամրապնդել Քոչարյանի մեղսագրվող մեղադրանքները»,- ընդգծել է Հայկ Ալումյանը։