Մանվել Գրիգորյանին գրավով ազատելու նոր միջնորդություն է ներկայացվել դատարան.hetq.am

Ազգային ժողովի նախկին պատգամավոր, Գեներալ  Մանվել Գրիգորյանին գրավի դիմաց ազատ արձակելու նոր միջնորդություն է ներկայացվել դատարան: Այս մասին  «Հետքի» հետ զրույցում ասաց Գրիգորյանի  պաշտպաններից Արսեն Մկրտչյանը: Վերջինս չասաց, թե որքան գրավի չափ են նշել միջնորդության մեջ: Նշենք, որ Մանվել Գրիգորյանը ամիսներ շարունակ կալանքի տակ գտնվելուց հետո 2018-ի դեկտեմբերի 21-ին 25 մլն դրամ գրավով ազատ էր արձակվել, սակայն Վերաքննիչ դատարանը վերացրել էր այս որոշումն ու որոշել նրան նորից կալանավորել: Սկսած 2019-ի հունվարի 22-ից՝ Գրիգորյանը նորից կալանքի տակ է: Մեզ հետ զրույցում  պաշտպան Արսեն Մկրտչյանը նշեց, որ գործը նորից մակագրվել է առաջին ատյանի այն դատավորին, ով մշտապես Գրիգորյանին կալանավորելու կամ նրա կալանքի ժամկետը երկարացնելու վերաբերյալ որոշումներն է կայացրել: «Գործը նորից անհասկանալիորեն մակագրվել է դատավոր Մարինե Մելքոնյանին, ես չգիտեմ, թե ինչու է ամեն ինչ արվում, որ Մանվել Գրիգորյանի խափանման միջոցի գործերը հենց Մարինե Մելքոնյանին մակագրվի: Այնքան ենք գրավի միջնորդություն ներկայացնելու, մինչև դրա քննությունը Մարինե Մելքոնյանին չմակագրվի»,- ասաց Արսեն Մկրչտրյանը: Հիշեցնենք, որ Մանվել Գրիգորյանին մեղադրանք է առաջադրվել Քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև Քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար: Ըստ Դատախազության տարածած հաղորդագրության՝ հունիսի 16-ին օրենքով սահմանված կարգով իրականացված խուզարկություններով Գրիգորյանին պատկանող կամ նրա փաստացի տիրապետության տակ գտնվող առանձնատներում, ավտոմեքենաներում, շենքերում, շինություններում կատարվել են 6 խուզարկություններ, որոնց արդյունքում հայտնաբերվել և վերցվել են մեծ քանակությամբ նռնակներ, հակատանկային ականանետներ, տրոիլային պայթաղյուսներ, ավելի քան 17 000 տարբեր տրամաչափի փամփուշտ, այլ ռազմամթերք ու հրազեն: Խուզարկությամբ հայտնաբերվել է նաև 71 760 000 դրամ, 80 000 ԱՄՆ դոլար, 67 350 եվրո, 246 500 ուկրաինական արժույթ: Բացի այդ, Արմավիրի մարզի Արշալույս գյուղի և Էջմիածին քաղաքի համապատասխան հասցեներում գտնվող շինություններում կատարված խուզարկությունների արդյունքում հայտնաբերվել է 33 տրանսպորտային միջոց, այդ թվում՝ «Ռոյս Ռոլս», «Տոյոտա Լանդ Կրաուզեր», «Մերսեդես», «Համմեռ», «Ռենջ ռովեռ սուպերչարջ», ինչպես նաև խորհրդային արտադրության՝ նաև կոլեկցիոն ավտոմեքենաներ, այդ թվում՝ զինվորական նշանակության տրանսպորտային միջոցներ: Արմավիրի մարզի Արշալույս գյուղի համապատասխան հասցեում կատարված խուզարկությամբ՝ կենդանիներ պահելու համար առանձնացված հատվածում հայտնաբերվել են Տավուշի մարզի Չորաթան գյուղի, Վերին Ծաղկավան գյուղի, Շիրակի մարզի Ախուրյանի, Երևանի մի քանի և Էջմիածնի դպրոցների աշակերտների և ուսուցիչների կողմից հավաքագրված գումարներով ապրիլյան քառօրյա պատերազմի մասնակիցների համար որպես օգնություն ուղարկված մեծ քանակությամբ պարկերով և արկղերով սննդամթերք, բժշկական և հիգիենայի պարագաներ, դեղորայք, զինվորական նախշերով պայուսակներ, տուփերով ներքնաշոր: