Քոչարյանի ազատության գինը՝ ում քաղցին է հագուրդ տրվում
Վերաքննիչ քրեական դատարանը, Մնացական Հարությունյանի նախագահությամբ, հրապարակեց ՀՀ երկրորդ նախագահ Ռոբերտ Քոչարյանի խափանման միջոցի վերաբերյալ որոշումը։ Քոչարյանը կշարունակի մնալ անազատության մեջ և Առաջին ատյանի դատարանի որոշումը՝ նրա խափանման միջոց կալանավորումը ևս երկու ամսով երկարաձգելու վերաբերյալ կմնա ուժի մեջ։ Դատարանի որոշումից հետո Քոչարյանի պաշտպան Հայկ Ալումյանը հայտարարել է, որ սպասելի էր նման որոշումը. «Այս որոշումը գնահատում եմ բացասական եւ համարում եմ, որ այս որոշման մեջ իրավաբանական կոմպոնենտը հավասար է զրոյի»։ Ալումյանը հայտարարել է, որ այս որոշումը կայացել է քաղաքական պատվերի արդյունքում․ «Իրավաբանությունն այս որոշման մեջ հավասար է զրոյի։ Պրոցեսն ընթանում էր հավասարության սկզբունքի հիման վրա, դատավորն ընտրվել էր օրինական ճանապարհով, ինչը ես արձանագրեցի, երբ այդ հարցը եղավ։ Այս որոշումը բացարձականապես իրավաբանության հետ կապ չուենցող որոշում է, որովհետեւ որեւէ անաչառ իրավաբան, եթե նայի այն, ինչ ներկայացված է եղել մեր վերաքննիչ բողոքում, առնվազն մի 10 առանձին հիմք կգտնի, որոնցից յուրաքանչյուրը բավարար է, որպեսզի այսօր պարոն Քոչարյանն ազատ արձակվի»։ Հարցին՝ ինչպե՞ս արձագանքեց երկրորդ նախագահը որոշմանը, պաշտպանը նշեց․ «Պարոն Քոչարյանը հերթական անգամ համոզվեց, որ այս գործով ինքը ենթարկվում է քաղաքական հետապնդմանը։ Զրուցում էինք, քննարկում էինք դատարանի այս որոշումը, եւ նա արտահայտեց այն կարծիքը, որ եւս մեկ անգամ համոզվեց, որ այս գործով արդարադատություն չի իրականացվում, իրականացվում է քաղաքական հետապնդում։ Պարտադիր բողոքարկելու ենք, հերթական բողոքն է գնալու Եվրոպական դատարան, զուգահեռաբար դիմելու ենք Վճռաբեկ դատարան»։ Կասկած չկա, որ միջազգային ատյաններում հերթական որոշումն է կայացվելու մեր պետության դեմ, քանի որ երկրորդ նախագահի պաշտպանները ամիսներ շարունակ, կետ առ կետ, տող առ տող հիմնավորել են, որ երկրորդ նախագահին վերագրված մեղադրանքը «ջուր» է։ Մյուս կողմից՝ Նիկոլ Փաշինյանը ամբոխին տեսարաններով սնելու հույժ անհրաժեշտության առջեւ է կանգնած, երկրում իրական փոփոխություններ չեն լինում, տնտեսություն չի զարգանում, ներդրումներն ուշանում են։ Եւ հիմա քանի որ որեւէ փոփոխություն՝ լավ իմաստով, երկրում տեղի չի ունենում, մարդկանց մնում է սնել դեմագոգիայով, պոպուլիզմով։ Կա մի խավ, որը դեռ էյֆորիայից դուրս չի եկել եւ սնվում է արյան, բռնել-փակելու մասին տեսարաններով։ Իսկ այդ խավը պատկերացրեք, թե ինչ հոգեխանգարմունքի մեջ կընկներ, եթե հանկարծ Ռոբերտ Քոչարյանը մարտի մեկին ազատության մեջ լիներ։ Իսկ դատական համակարգի համար այս որոշումը ճակատագրական էր այն առումով, որ այդ համակարգը ապացուցեց, որ գտնվում է Փաշինյանի ազդեցության ներքո։ Անի Սահակյան
Հետևեք մեզ Viber-ում
