ՀՀ-ն Արցախի անվտանգության երաշխավորն է, մասնակցում է բանակցություններին․ ԱԳ նախարար

ԱԺ «Լուսավոր Հայաստան» խմբակցության փակ նիստին քննարկվել է արցախյան հարցը. հանդիպումից հետո լրագրողների հետ ճեպազրույցին ասաց ԱԳ նախարար Զոհրաբ Մնացականյանը: «Շատ լավ առիթ է, որ միասին քննարկենք հարցեր, որոնք վերաբերում են բոլորիս: Մենք խոսեցինք տարբեր հարցերի շուրջ, ինձ համար՝ որպես կառավարության անդամ, շատ կարևոր է ԱԺ խմբակցությունների հետ աշխատելը: Սա երկխոսություն է, որտեղ մենք համեմատում ենք մոտեցումները, գնահատականները, փորձում ենք տեսնել՝ ինչն է ճիշտ, ինչի վրա առավել ուշադրություն դարձնել»,- հայտարարեց նախարարը: Անդրադառնալով Նիկոլ Փաշինյանի այն հայտարարությանը, թե արցախյան հակամարտությունն ունի երեք կողմ, Զոհրաբ Մնացականյանն ասաց. «Հայաստանն ունի իր մասը, Հայաստանը երաշխավորն է Արցախի անվտանգության, Հայաստանը մասնակցում է բանակցություններին և շարունակելու է այդ ամենն անել»: