Դռնփակ քննարկումներ՝ Փաշինյանի մասնակցությամբ․ ՊԵԿ նախագահը փոխվելո՞ւ է

Երեկ խորհրդարանական մեծամասնությունը՝ «Իմ քայլը» խմբակցությունը, չորս ժամանոց դռնփակ քննարկում է ունեցել, որին մասնակցել են վարչապետ Նիկոլ Փաշինյանը, որոշ նախարարներ ու մարզպետներ։ Տպավորությունն այնպիսին է, որ տեղի է ունեցել «Քաղաքացիական պայմանագիր» կուսակցության քաղաքական թիմի հավաք՝ ընդլայնված կազմով, խորհրդարանի շենքում։ Սակայն նույնիսկ հեղափոխությունը Հայաստանում նոր քաղաքական մշակույթ, ըստ ամենայնի, չի ձևավորել ու արտաքին քաղաքականությունը շարունակում է մնալ գործադիրի բացառիկ իրավասությունը։ Համենայն դեպս, «Իմ քայլը» խմբակցության ղեկավար Լիլիթ Մակունցի երեկվա հարցազրույցից ակնհայտ է դառնում, որ արտաքին քաղաքական հարցերին հատուկ անդրադարձ չի կատարվել անգամ յուրայինների միջավայրում։ Մինչև խորհրդարանական երեկվա հանդիպման բովանդակային կոնկրետ դետալին անդրադառնալը՝ խոսենք մի ռիսկի մասին, որն այս պահին գուցե նկատելի չէ, սակայն առաջիկայում կարող է էապես խաթարել խորհրդարանական ժողովրդավարության հիմքերը։ Անշուշտ, աշխարհում ընդունված պրակտիկա է, երբ գործադիր իշխանության ղեկավարը պարբերաբար հանդիպումներ է ունենում իր խորհրդարանական հենարանի հետ՝ փորձելով ներդաշնակեցնել քաղաքական թիմի օրակարգը։ Սակայն հեղափոխական էյֆորիայի հետևանքով Հայաստանի ներկայիս խորհրդարանում վարչապետին սատարող ուժն ունի սահմանադրական մեծամասնություն, մյուս կողմից՝ անգամ անզեն աչքով տեսանելի է, որ խորհրդարանի այսօրվա քաղաքական դասավորությունը հասարակական տրամադրություններից օտարանում է ոչ թե ամեն շաբաթ, այլ նույնիսկ՝ ամեն օր։ Գործադիր իշխանության ոչ էֆեկտիվ կառավարումը միայն նպաստում է դրան, էլ չենք ասում նորընտիր խորհրդարանի պատգամավորների ոչ ադեկվատ հայտարարությունների մասին, որոնցից վերջինն, օրինակ՝ վերաբերում էր օրհներգի փոփոխության նպատակահարմարությանը։ Նման իրավիճակներում Նիկոլ Փաշինյանը ավելի լայն քաղաքական կոնսենսուսի կամ համաձայնությունների անհրաժեշտություն ունի, հակառակ պարագայում՝ կա վտանգ, որ պետական ու կուսակցական օրակարգերի մեկտեղումը կարող է խորացնել կառավարման ճգնաժամն, ինչն ավելի ակնառու կդառնա, երբ հանրային տրամադրությունենրի բնական սեգմենտացիայից հետո կառավարության վարկանիշն օբյեկտիվ անկում արձանագրի։ Այդ գործընթացն արդեն նկատելի է։ Վերադառնալով երեկվա հանդիպմանը՝ նկատենք, որ, դատելով Մակունցի խոսքից, դրա ընթացքում հիմնականում խոսվել է, այսպես կոչված, պրեմիաների թեմայով։ Մակունցը կրկնել է Փաշինյանի հայտնած տեղեկությունը, որ միլիոններով պարգևավճար ստացած Պետեկամուտների կոմիտեում այս տարի չափը կվերանայվի։ «Ինչպես վարչապետը արդեն հայտարարել է, այս հանդիպման ժամանակ նույնպես նշեց այդ հանգամանքը, որ Պետեկամուտների կոմիտեի պարգևավճարների ընդհանուր բյուջեն ուղիղ կեսով՝ 50 տոկոսով կրճատվել է 2019 թվականի համար։ Սա արդեն կարևոր քայլ է կարծում եմ, այսինքն՝ այս խմորումները, քննարկումները, խնդրի բարձրաձայնումը արդեն իսկ արձագանք ստացել է և լուծումներ ստանում է», – ընդգծել է Մակունցը։ Այնպիսի տպավորություն է, որ պարգևավճարների հետ կապված հանրային մեծ աղմուկը ստիպել է, որ կառավարությունն ու նրա խորհրդարանական հենարանը հանգեն երկու պրիմիտիվ հետևության։ Առաջինը վերաբերում էր Արարատի մարզպետի սահմանած պարգևավճարի չափին, որը գերազանցում էր մեկ դրույքաչափը։ Այս պատմությունը «ջրելու» համար Գարիկ Սարգսյանը վերածվեց «քոմեդի աստղի»՝ կոկորդիլոսի ձվի մասին իր հայտնի «հայտնագործությամբ»։ Բոլորս ծիծաղեցինք ու Գարիկ Սարգսյանի թեման փակվեց(յուրաքանչյուր իշխանություն, ըստ ամենայնի՝ ունենում է իր Գալուստ Սահակյանը, հիմա կարծես հասունանում է ՊԵԿ նախագահի փոփոխության թեման ու պրեմիաների հարցը այս հարթության վրա կարող է աշխուժանալ՝ միայն այդքանով էլ քննարկվելով ու չդառնալով կոնկրետ քաղաքական պատասխանատվության հարց ու իսնտիտուցիոնալ լուծումներ գտնելու անհրաժեշտություն։ 1in.am