Ինչ տարածք, ինչ բան. Փաշինյանի ու Ալիևի «վերելակը» խափանվեց
Պաշտոնական Բաքուն հատուկ հայտարարությամբ երեկ արձագանքել է Հայաստանի վարչապետին, որը նախօրեին բացառել էր, որ իր կառավարությունը կարող է քննարկել «տարածքներ խաղաղության դիմաց» բանաձևը։ «Փաշինյանի տրամաբանությունը դժվար է հասկանալ: Ինչպես հայտնի է, ԵԱՀԿ Մինսկի խմբի հովանու ներքո անցկացվող բանակցությունների հիմքում ընկած է հենց հայկական ուժերի դուրսբերումը Ադրբեջանի գրավյալ տարածքներից», - հայտարարել է Ադրբեջանի արտգործնախարարությունը՝ հավելելով. «այդ պահանջը արտացոլված է ՄԱԿ-ի Անվտանգության խորհրդի 4 բանաձևերում, ինչպես նաև հակամարտության կարգավորման շուրջ միջազգային կազմակերպությունների կողմից ընդունված գրեթե բոլոր փաստաթղթերում: Այս պարագայում հարց է առաջանում՝ արդյո՞ք Փաշինյանի այդ հայտարարությունը չի նշանակում բանակցություններից հրաժարում»: Հիշեցնենք, որ նախօրեին խոսելով ղարաբաղյան խնդրի շուրջ վերջին զարգացումներից, վարչապետ Փաշինյանը լրագրողներին ասել էր. «Մենք չենք կարող նույնիսկ քննարկել «տարածքներ խաղաղության դիմաց» բանաձևը։ Մեր կառավարությունը Ղարաբաղի հարցում վարում է մի քաղաքականություն, որ նախկինում ոչ մի իշխանություն չի վարել։ Որևէ զուգահեռ տանելը և նախկինում վարած քաղաքականության հետ ընդհանրություն գտնելու փորձերը կատարյալ մոլորություն են»։ Ահա, եկավ պահը, որ պաշտոնական Երևանի կողմից Արցախի վերաբերյալ հայտարարությունները, կարելի է ասել՝ հունից հանեցին Ադրբեջանի իշխանություններին: Մինչ այժմ պաշտոնական Երևանը բավական զգուշավորություն էր ցուցաբերում, ավելին՝ նույնիսկ կառուցողական էր որակում Ալիևի հետ մի քանի հանդիպումները, հատկապես Դուշանբեի վերելակային պայմանավորվածությունները: Հայաստանում քննադատության մեծ դոզայի պայմաններում, ահա, Նիկոլ Փաշինյանն ու Զոհրաբ Մնացականյանը ստիպված եղան որոշ հայտարարություններով փարատել Հայաստանի կողմից հնարավոր զիջումները՝ Ադրբեջանի գոհունակ տրամադրությունների ֆոնին: Երևանն, այսպիսով, փոխում է տոնայնությունը, իսկ Բաքուն՝ հարկադրված արձագանքում, զգալով վտանգը: Հայկական կողմի բանաձևը շատ պարզ է՝ հայկական կողմը հարկ եղած պահից կարող է հայտարարել, որ Արցախը չի ընդունում կարգավորման այս կամ այն տարբերակը: Ավելին՝ փաշինյանը, կարելի է ասել, արդեն իսկ հարված է հասցնում, հասկացնելով՝ «մեզանից անհարկի տարածքների վերադարձ չսպասեք...»: Թամար Բագրատունի
Հետևեք մեզ Viber-ում
