Իշխանությունը «հանցագործներ» կբուծի, որպեսզի նրանց միջոցով փող աշխատի

Ինչպես հայտնի է Ֆինանսների նախարարությունը շրջանառության մեջ է դրել «Հարկային օրենսգրքում փոփոխություններ եւ լրացումներ կատարելու մասին» ՀՀ օրենքի նախագիծը, որով փաստաբանների, խորհրդատուների եւ հաշվապահների համար շրջանառության հարկի համակարգում աշխատելու սահմանափակումներ են նախատեսվել: Նախագծի համաձայն` փաստաբանները ընդհանուր հարկման ռեժիմ են տեղափոխվելու, 5 տոկոս շրջանառության հարկի փոխարեն 20% ԱԱՀ են վճարելու: Ֆինանսների նախարարի տեղակալ Արման Պողոսյանը հունվարի 30-ին, Հարկային օրենսգրքի փոփոխություններին նվիրված հանրային քննարկման ժամանակ, արձագանքելով փաստաբանական ծառայությունները ԱԱՀ-ից ազատելու առաջարկին, աղմկահարույց հայտարարությամբ հանդես եկավ․ «Այսօր եթե մենք փաստաբանական ծառայություններն ազատենք ավելացված արժեքի հարկից կամ նրանց համար սահմանենք ցածր հարկային բեռ, բոլորն են օգտվելու այդ հարկային բեռից, բոլոր շահառուները, այդ թվում՝ հանցագործները։ Հիմա հարց է ծագում՝ մենք ազգովի պետք է սուբսիդավորե՞նք այդ հանցագործներին»։ Ստացվում է, ըստ փոխնախարարի տրամաբանության , բոլոր նրանք, ովքեր օգտվում են փաստաբանական ծառայություններից,հանցագործներ են։ Համաձայնեք զիլ տրամաբանություն է, համաձայն որի, բոլոր նրանք, ում ձեռքին կտեսնենք դանակ, կնշանակի նրանք մարդասպաններ են։ Փոխնախարարի այս հայտարարությունը, ավելի ճիշտ հարկային բեռի ավելացման վերաբերյալ զվարճալի հիմնավորումը փաստաբանական համայնքի զայրույթն է առաջացրել։ Բացի նրանից, որ այս վարչարարությունից մեծապես տուժելու է իրենց գործը, իշխանության ներկայացուցչի խոսքերից պարզ է դառնում առհասարակ նրանց տեսլականը մարդու իրավունքների պաշտպանության, անմեղության կանխավարկածի եւ այլնի վերաբերյալ։ Փաստաբան Նորայր Նորիկյանը լրատվամիջոցների հետ զրույցում խայտառակություն է որակել թե փոխնախարարի հայտարարությունը, թե իշխանության մոտեցումը «Կարծում եմ, ուղղակի խայտառակություն է, որ Հայաստանի նոր կառավարությունը ներկայացնող նման անձնավորություն կա, կարևորագույն պաշտոն զբաղեցնող մարդ, ով այդպիսի տարրական պատկերացում ունի անմեղության կանխավարկածի, անձի պաշտպանության իրավունքի, ՀՀ Սահմանադրության, դատական պաշտպանության իրավունքի և ընդհանրապես ՀՀ օրենսդրության մասին» , -ասում է նա։ Երվանդ Վարոսյանն էլ վստահեցնում է, որ փաստաբանական գործունեության հարկային բեռը ծանրացնելով, ինչն անխուսափելի հանգեցնելու է իրավաբանական ծառայությունների գնաճի, արդյունքում` նման օգնություն ստանալու ողջամիտ հնարավորության էլ ավելի է բարդանալու։ Կարող ենք ենթադրել, թե ինչու է իշխանությունը նման փոփոխություն ձեռնարկել։ Հակառակ հավաստիացումների ներդրումներն այդպես էլ ուշանում են, մինչդեռ բյուջեն լցնելու խնդիր կա, որը կանեն նման միջոցներով, չի բացառվում, որ մոտ ապագայում հայրենի կառավարությունը անգամ օդի՝ շնչելու հարկ սահմանի։ Իսկ փաստաբանների դեպքում պարզապես պարարտ հող է ստեղծված բյուջեն շատ փող լցնելու համար։ Թավշյա հեղափոխությունից հետո իշխանության հաշվեհարդարի քաղաքականության արդյունքում ի հայտ են գալիս տասնյակ «հանցագործներ», որոնք փաստաբանական ծառայության կարիք ունեն, հետեւաբար մի կողմից կարելի է նրանց թիվն ավելացնել, մյուս կողմից բյուջե փող լցնել։ Անի Սահակյան