Նիկոլ Փաշինյանն ու Անգելա Մերկելը՝ վիզաների ազատականացման մասին
Գերմանիայի կանցլեր Անգելա Մերկելն այսօր Բեռլինում ՀՀ վարչապետ Նիկոլ Փաշինյանի հետ համատեղ մամուլի ասուլիսի ժամանակ անդրադարձել է Հայաստանի հետ վիզաների ազատականացման և Հայաստանին տրամադրվող ֆինանսական աջակցության մասին հարցին: «Այո, մենք արդեն աջակցում ենք: Եվրոմիությունն արդեն պարոն Յոհաննես Հաանի միջոցով իր դիրքորոշումը հստակ արտահայտել է: Մենք չենք ցանկանում միջամտել արտաքին քաղաքականությանը, Հայաստանն իբրև պետություն ինքն է որոշում՝ որ երկրների հետ պետք է աշխատի արտաքին հարաբերություններում: Եվ մենք արդեն ունենք պայմանագիր, որով կարող ենք զարգացնել մեր հարաբերությունները, ոչ միայն Գերմանիան, այլ նաև Եվրոմիությունը»,- ասել է կանցլերը: ՀՀ վարչապետը ևս անդրադարձել է հարցին: «Կարծում եմ՝ Յոհաննես Հաանի վերջին այցը հստակ պատասխան էր այդ հարցին, և ԵՄ ներկայացուցիչներն արդեն հայտարարել են, որ ցանկանում են ընդլայնել Հայաստանին տրամադրվող օժանդակության ծավալները: Ակնհայտ է, որ ՀՀ-ԵՄ հարաբերություններում շատ լավ գործընկերային մթնոլորտ է հաստատված: Ինչ վերաբերում է վիզաների ազատականացմանը՝ այդ թեման նույնպես քննարկել ենք, և այդ առումով կարևոր է, որպեսզի Հայաստանն առավել գրավիչ երկիր լինի սեփական քաղաքացիների համար: Ուրախ եմ արձանագրել, որ 2018-ին երկար տարիներ ի վեր առաջին անգամ Հայաստան վերադարձող քաղաքացիների թիվն ավելի մեծ է եղել, քան Հայաստանից մեկնողների թիվը: Եվ այնպիսի ինստիտուցիոնալ զարգացումներ պետք է իրականացնենք, որպեսզի Հայաստանը չդիտարկվի որպես փախստականներ մատակարարող երկիր: Եվ այս տարվա զարգացումները ցույց են տալիս, որ մենք այդ ուղղությամբ շարժվում ենք վստահ: Հույս ունեմ՝ առավել նպաստավոր պայմաններ կստեղծենք Եվրոմիության հետ վիզաների ազատականացման հաջողության հասնելու համար»:
Հետևեք մեզ Viber-ում
