«Ենթադրենք՝ Քոչարյանին նստեցնեն, մենք կիմանա՞նք, թե ովքեր են 10 սպանություններն իրականացրել». Աղասի Ենոքյան
Հայելի ակումբում լրագրողների հետ հանդիպման ժամանակ քաղաքագետ Աղասի Ենոքյանը անդրադառնալով մարտի 1-ին գործի բացահայտման գործընթացին՝ շեշտել է, որ հասարակության մեջ դեռևս հարցեր են մնում այդ գործով: «Իշխանությունները կենտրոնացած են միայն Ռոբերտ Քոչարյանի վրա, բայց մենք մինչև հիմա դեռ չգիտենք, թե ով է կրակել քաղաքացիներին և սպանել նրանց: Մենք գիտենք, որ Հայաստանի երկրորդ նախագահը մեղադրվում է այն հոդվածը խախտելու մեջ, որն այն ժամանակ չի էլ եղել: Ինձ համար հասկանալի չէ Մարտի մեկի գործի քննության այսպիսի ընթացքը: Ենթադրենք՝ Քոչարյանին նստեցնեն, մենք կիմանա՞նք, թե ովքեր են տասը սպանություններն իրականացրել: Մարտի մեկի գործի այսպիսի հանգուցալուծումը, կարծում եմ, հանրությանը չի բավարարի», - նկատել է Ենոքյանը: Քաղաքագետը նշել է, որ իր համար եւս պարզ չէ ՀՀ երկրորդ նախագահ Ռոբերտ Քոչարյանին առաջադրված մեղադրանքը՝ սահմանադրական կարգի տապալում. «Եթե սահմանադրական կարգը տապալել է, հետո վերականգնվե՞լ է, թե ոչ: Թե մինչեւ հիմա տապալված է մնացել: Փոխարենը, կարելի էր ուղիղ ճանապարհով գնալ ու պարզել, թե ովքեր են սպանությունների հրամաններ տվողները»:
Հետևեք մեզ Viber-ում
