«Ընդունում եմ Սասուն Խաչատրյանի հրավերը». Վիտալի Բալասանյան

168 ժամը գրում է.«Սահմանադրական կարգի տապալման հոդվածը մի քիչ ծիծաղելի է, ձեր համար էլ է երևի ծիծաղելի»,- հունվարի 28-ին «Եռաբլուր» պանթեոնում լրագրողների հետ զրույցում անդրադառնալով «Մարտի 1»-ի գործին՝ նշել էր Արցախի անվտանգության խորհրդի քարտուղար Վիտալի Բալասանյանը: «Ո՞նց եք պատկերացնում, ասենք, էսօր Նիկոլ Փաշինյանը սահմանադրական կարգը տապալի, որ մնա վարչապետ: Ի՞նչ է նշանակում՝ սահմանադրական կարգը տապալել են։ Սահմանադրական կարգը կտապալի այն ուժը, որն իշխանության չէ, իշխանության գտնվող մարդն ինչո՞ւ է սահմանադրական կարգը տապալում,- հայտարարեց Բալասանյանը՝ ընդգծելով՝ չի տեսնում, որ բանակն այն ժամանակ մասնակցել է ներքաղաքական կյանքին. «Միգուցե մասնակցել են ոմանք, բայց էդ հրամանը, ինչի մասին դուք ժամանակ առ ժամանակ ասում եք, այդ հրամաններում այդպիսի բան չկա, 0038 հայտնի հրամանը։ Ժամանակը կգա, բոլորդ էլ կտեսնեք, կասեք՝ ամոթ ա մեզ: 0038 հրամանով զորքը բերվել է զորանոցային վիճակի, ցանկացած երկրում կգնան դրան: Զորքը չի մասնակցել ներքաղաքական հարցերին, դուք զորք տեսե՞լ եք, որ այն ժամանակ կրակում էին»: Լրագրողներից մեկի հարցին, թե ո՞վ է այդ դեպքում կրակել, Վիտալի Բալասանյանը պատասխանել էր, որ Ներքին զորքերն են կրակել. «Բանակն այդպիսի զինատեսակ էլ չունի, այդպիսի զինամթերք էլ չունի, երբևիցե չի էլ ունեցել, դա ներքին զորքերինն է, ինչի՞ եք խառնում ամեն ինչ»։ Լրագրողի դիտարկմանը, թե Հատուկ քննչական ծառայության (ՀՔԾ) պետ Սասուն Խաչատրյանն ասել է, որ ժամկետային զինծառայող Տիգրան Աբգարյանը սպանվել է, որպեսզի արտակարգ դրություն մտցնելու հիմք ունենան, Վիտալի Բալասանյանը պատասխանել էր. «Ամոթ է, ճիշտն ասած, չի կարելի այդպիսի բաներ ասել: Մանավանդ էս վերջին ժամանակները մենք տեսնում ենք զոհվածների ծնողներին, երբ որ տարբեր քաղաքական դիվիդենտներ շահելու համար այդ ընտանիքներին գցել են նման իրավիճակի մեջ: Ամոթ է, չի կարելի նման բաներ անել: Ի՞նչ է նշանակում՝ սպանել են, որպեսզի արտակարգ դրություն մտցնեն: Դուք գիտեք՝ ովքեր արտահայտում են այդ բառերը, կարճ ժամանակից հետո շատ փիս վիճակի մեջ են ընկնելու»։ Լրագրողի դիտարկմանը, թե ծիծաղելի՞ է արդյոք, որ «Մարտի 1»-ի գործով կալանավորել են ՀՀ երկրորդ նախագահ Ռոբերտ Քոչարյանին, կամ մեղադրանք է առաջադրվել մնացած պաշտոնյաներին, Վիտալի Բալասանյանն ասել էր․ «Բերեք բոլորին կալանավորենք, էնտեղ նստենք, հետո ՀՔԾ-ն որոշի՝ ով է մեղավոր, ով մեղավոր չէ: Այսինքն՝ կալանքն ի՞նչ կապ ունի, երբ որ քրեական գործ է հարուցված։ Ես չգիտեմ, ով ինչքանով է մասնակցել, դա քննչական ծառայության գործն է։ Երբ որ էսօր վճիռ չկա, ես ինչպե՞ս կարող եմ մարդու վրա մեղք դնել, ասել՝ դուք հատուկ կրակել եք Տիգրան Աբգարյանի վրա, որպեսզի արտակարգ իրավիճակ կամ դրություն մտցվի, մի քիչ ծիծաղելի է»: Ապա հավելել էր, որ դատարանը կորոշի, թե ով է մեղավոր Մարտի 1-ի 10 զոհերի համար։ Բալասանյանի՝ այս հարցուպատասխանից հետո, լրագրողները Բանակի տոնին նվիրված միջոցառումից առաջ հարցեր էին ուղղել նաև ՀՔԾ պետ Սասուն Խաչատրյանին։ Վերջինս, անդրադառնալով Բալասանյանի խոսքերին, ասել էր. «Եթե ամոթանք է տվել, թողնում եմ իր խղճին, իսկ եթե նա լուրջ իրավաբան է, իրեն հրավիրում եմ՝ գա, նստի, քննարկենք իրաբավանական տեսանկյունից: Դուք ուզում եք՝ Բալասանյանի խոսքերը մեկնաբանե՞մ… շատ վատ է, եթե նման գնահատական է տվել: Չեմ կարծում, որ Վիտալի Բալասանյանն այն անձն է, որը կարող է իրավաբանական գնահատականներ տալ»: Այսօր Արցախի անվտանգության խորհրդի քարտուղար Վիտալի Բալասանյանը հայտարարություն է արել, որում ասվում է. «Ծանոթացա Հայաստանի Հատուկ քննչական ծառայության պետ Սասուն Խաչատրյանի մեկնաբանությանը հունվարի 28-ին Եռաբլուրում լրագրողների հարցերին ի պատասխան իմ հնչեցրած պատասխանների վերաբերյալ։ Ընդունում եմ Սասուն Խաչատրյանի հրավերը՝ իրավական տեսանկյունից քննարկելու վերը նշված իրադարձությունները գործի նյութերին ծանոթանալուց հետո»։