ՊԵԿ նախագահը բացեց փակագծերը (video)

Պետական եկամուտների կոմիտեի նախագահ Դավիթ Անանյանը հունիսի 29-ին խորհրդարանում «Իմ քայլը» խմբակցության անդամների հետ հանդիպումից հետո լրագրողների հետ զրույցում հայտնեց, որ մանրամասն պարզաբանումներ է տվել պարգևատրումների, աշխատավարձերի, ընդհանուր այն տեղեկատվության հիման վրա, որը հրապարակման ենթակա է: «Սա դռնփակ նիստում աշխատանքային կարգով իրականացված քննարկում էր: Մենք ասում էինք, որ պետք է հաշվետվողականություն ունենանք, չէ՞: Հիմա աշխատանքային կարգով մեր գործընկերները հրավիրել են, ես եկել եմ, քննարկել ենք»,- ասաց Անանյանը: Ճշտող հարցին՝ եթե ընդդիմությունը հրավիրի պարզաբանումներ տալու, կգա՞, նա պատասխանեց. «Իհարկե, ով հրավիրի, ես կգամ»: Անանյանի խոսքով՝ ինքը ոչ թե հիմնավորել է պարգևավճարների հարցը, այլ պարզաբանումներ ներկայացրել. «Ես չեմ ասելու՝ իրենք բավարարվա՞ծ են, թե՞ չէ։ Ես հարցերին պատասխանել եմ, ինքս ինձնից բավարարված եմ։ Ամեն ինչ ճիշտ է կատարվել՝ օրենքի տառին համապատասխան»։ Նա հերքեց, որ 9 մլն պարգևատրում է եղել. «Դա սուտ է, 9 մլն պարգևատրում գոյություն չունի, 8 մլն չկա, 7 մլն չկա, 6 մլն չկա»։ Անդրադառնալով իր տարեկան եկամուտների հայտարարագրին՝ Անանյանը նշեց, որ 4.8 մլն դրամ ֆինանսների նախարարությունից է ստացել 4.5 ամսվա համար, 18.5 մլն՝ ՊԵԿ-ից՝ 7.5 ամսվա համար. «8 մլն՝ չկա էդ թիվը։ Եթե բաժանեք 7-ի, կստանաք միջինը 2.3 մլն։ Իմ եկամուտները ամսական 2.3 մլնը չեն գերազանցում՝ աշխատավարձով, հավելավճարով և պարգևատրումներով»։