Մանրամասներ Քոչարյանի գործով դատական նիստից. ինչ որոշվեց

Հայաստանի վերաքննիչ քրեական դատարանում քիչ առաջ հետաձգվեց Հայաստանի երկրորդ նախագահ Ռոբերտ Քոչարյանի խափանման միջոցի հարցի վերաբերյալ քննությունը։ Գործով դատախազները ժամանակ խնդրեցին դատարանից՝ պաշտպանական կողմի ներկայացրած բողոքին ծանոթանալու համար։ Բողոքի քննությունը կշարունակվի հունվարի 31–ին։ Քոչարյանի պաշտպաններից Հայկ Ալումյանը լրագրողներին տեղեկացրեց, որ դատարանը համապատասխան փաստաթուղթ է ներկայացրել, ինչը հաստատում է, որ գործը դատարանի տվյալ կազմին է մակագրվել էլեկտրոնային եղանակով։ «Խնդիր էր բարձրացվել, որպեսզի պարզաբանվի, թե ինչ սկզբունքով է որոշել այս բողոքը քննող դատավորը: Մեզ պարզաբանվեց և տրվեց համապատասխան փաստաթուղթը, և նշվեց, որ այս անգամ էլեկտրոնային մակագրությամբ է որոշվել դատարանի կազմը և մենք համարում ենք, որ սա միակ օբյեկտիվ տարբերակն է դարատարանի կազմը որոշելու համար, որից հետո փաստաբան Արամ Օրբելյանի կողմից ներկայացվեց առաջին վերքաննիչ բողոքը, որը մենք ներկայացրել էինք հունվարի 18-ին: Այդ բողոքը ներկայացվեց: Այնտեղ երկու հիմքեր էին: Այն շատ մանրամասներ իր մնեջ չէր պարունակում հասկանալի պատճառներով, որովհետև դատարանի որոշումը դեռ մենք չունեինք. դատարանի որոշումը ստացանք հունվարի 21-ին: Եվ երբ այդ բողոքը ներկայացվեց դատախազները ժամանակ խնդրեցին, որպեսզի այսօրվա ներկայացրած ծավալուն բողոքին ծանոթանան և իրենց փաստարկները նախապատրաստեն»,-ասաց Ալումյանը: Հիշեցնենք, որ Երևան քաղաքի ընդհանուր իրավասության դատարանի դատավոր Արթուր Մկրտչյանը հունվարի 18–ին բավարարվել էր Հատուկ քննչական ծառայության քննիչի միջնորդությունը՝ Ռոբերտ Քոչարյանին կալանքի տակ պահելու ժամկետը երկարացնելու վերաբերյալ եւ մերժվել՝ պաշտպանների միջնորդությունը Ռոբերտ Քոչարյանի նկատմամբ որպես խափանման միջոց ընտրված կալանքն այլընտրանքային խափանման միջոց գրավով փոխարինելու մասին: Այս որոշումը պաշտպանական կողմը բողոքարկել էր Հայաստանի վերաքննիչ քրեական դատարանում։ Նշենք, որ Ռոբերտ Քոչարյանն առաջին անգամ կալանավորվել է 2018թ. հուլիսի 27–ին՝ Երևան քաղաքի ընդհանուր իրավասության դատարանի դատավոր Վաչե Մարգարյանի որոշմամբ։ Օգոստոսի 13-ին այս որոշումը բեկանել էր Վերանքնիչ քրեական դատարանի դատավոր Ալեքսանդր Ազարյանը՝ արձանագրելով, որ երկրորդ նախագահն անձեռնմխելի է։ Վճռաբեկ դատարանն էլ գործն ուղարկել էր Վերաքննիչ դատարան՝ նոր քննության։ Քոչարյանը երկրորդ անգամ կալանավորվել է 2018թ. դեկտեմբերի 7-ին Վերաքննիչ քրեական դատարանի դատավոր Ռուբիկ Մխիթարյանի որոշմամբ։ Հիշեցնենք, որ երկրորդ նախագահը «Մարտի մեկի» քրեական գործով մեղադրվում է Հայաստանի սահմանադրական կարգը տապալելու համար: Սահմանադրական կարգը տապալելու համար մեղադրվում են նաև ՀԱՊԿ նախկին գլխավոր քարտուղար Յուրի Խաչատուրովը, Հայաստանի պաշտպանության նախկին նախարարներ Միքայել Հարությունյանը եւ Սեյրան Օհանյանը։