«Վիդիտե լի», ինքը եկել է ու իրականացնելու է հպարտ քաղաքականություն. Էդուարդ Շարմազանով
ՀՀԿ խոսնակ Էդուարդ Շարմազանովը այսօր՝ հունվարի 27-ին, մամուլի ասուլիս է հրավիրել, որի ժամանակ խոսել է ներքին և արտաքին մարտահրավերների մասին, ներքին քաղաքականությունից, նոր խորհրդարանից: Շարմազանովի խոսքերով, այսօր քաղաքացիները չեն ճանաչում խորհրդարանում ներկայացված Իմ քայլը խմբակցության պատգամավորների 85 տոկոսին. «Ես, լինելով քաղաքական գործիչ, չեմ ճանաչում նրանց: Իսկ մեր ժամանակ խորհրդարանում էին Վահան Հովհաննիսյանը, Րաֆֆի Հովհաննիսյանը, Էդուարդ Շարմազանովը: Որ մեկին ասեմ»: Հարցին, թե իրենց իշխանության ժամանակ եղել է արդյոք ընդդիմություն, ԱԺ նախկին փոխխոսնակն ասաց, որ ինքը չի ունեցել. «Իմ գրպաններում եղել է միայն աշխատավարձ: Այնտեղ կողմնակի մարդիկ ու կողմնակի եկամուտ չի եղել: Նման բաներ չեն եղել ո՛չ գրպանում, ո՛չ ուղեղում, ո՛չ սրտում»: Այնուհետև հավելեց. «Խորհրդարանը նշանակովի էր օրվա իշխանության հերոս Նիկոլ Փաշինյանի կողմից իր քաղաքական ճաշակով՝ առանց ընդդիմության: Երբ ասում եմ իրական ընդդիմություն, ամենևին չեմ ուզում ստվեր գցել ո՛չ «Բարգավաճ Հայաստան»-ի, ոչ էլ «Լուսավոր Հայաստան»-ի վրա: Այս պառլամենտը Փաշինյանի և նրան սատարողների պառլամենտն է: Չնայած Փաշինյանը պառլամենտում ասում էր, որ ինքը չունի «իզմ»-եր, բայց ակնհայտ դարձավ, որ նա ունի «իզմ»-եր՝ դա իր պոպուլիզմն է: Նիկոլ Փաշինյանի իշխանությունը պոպուլիստական իշխանություն է»: Անդրադառնալով արտաքին քաղաքականությանը՝ Շարմազանովը նշեց. «Արտաքին քաղաքականության վերաբերյալ Փաշինյանը խրոխտ ձայնով ասում է, որ նախկին իշխանությունները իրականացրել են վիզը ծուռ քաղաքականություն, հիմա «վիդիտե լի» ինքը եկել է ու իրականացնելու է հպարտ քաղաքականություն: Հիմա ասեմ այդ հպարտ քաղաքականության արդյունքները: Հայաստանը դարձել է «իզգոյ», համարյա չեղած հաշիվ, Հայաստանը ՀԱՊկ-ում կորցրել է գլխավոր քարտուղարի պաշտոնը՝ Փաշինյանի շնորհիվ: Չմոռանանք, որ պառլամենտում Փաշինյանը հայտարարել էր, որ Հայաստանն այդ պաշտոնում պետք է շարունակի՝ մինչև լրանա լիազորությունների ժամկետը: Բայց հենց տեսավ՝ չստացվեց, ասում է՝ էական չի ՀԱՊԿ-ն: Իսկ ի՞նչն է էական՝ չպլանավորված հանդիպումը Դավոսո՞ւմ»:
Հետևեք մեզ Viber-ում
