Չմոռանաք, որ դուք մշակույթի ոլորտի այսօրվա պատասխանատուն եք, բայց ոչ այն մշակույթի, որը «տիկին Մակունցն» էր.Բաց նամակ Նազենի Ղարիբյանին

Ուզում եմ հիշեցնել տիկին Ղարիբյանին, որ իր գործառույթներից ամենագլխավորը ՀՀ մշակույթի քաղաքականության հայեցակարգ մշակելն է և մշակութային քաղաքականության իրականացումը, մշակույթի զարգացմանը միտված ծրագրերի մշակումը։ Եթե չկա հայեցակարգ և մշակույթի ոլորտը ամորֆ վիճակում է, ապա անհապաղ անհրաժեշտ է այդ դժվարին աշխատանքն իրականացնել։ Եթե չգիտեք ինչպես դա անել կամ չգիտեք թե դա ինչ է, ապա անհրաժեշտ է կանչել ոլորտի պրոֆեսիոնալներին և հարցնել, թե ինչն է մտնում Ձեր պարտականությունների մեջ և ինչը` ոչ, ինչպես կարող եք մշակել ճիշտ քաղաքականություն։ Սկզբի համար նշեմ, որ Ձեր առաջին և ամենակարևոր գործառույթը ՀՀ մշակույթի գործիչների աշխատանքի ազատությունը, ստեղծագործելու համար բարենպաստ հնարավորությունների ստեղծումն է և արտիստների գործունեությանը չխոչընդոտելը։ Եթե չեք կարող նրանց օգնել, ուրեմն մի խանգարեք, և ամեն բան հրաշալի կլինի։ Եթե մինչ հիմա չգիտեք, որ Ֆեյսբուքը քաղաքականություն իրականացնելու և զրպարտանքի վայր չէ, ապա ցավում եմ մեզ բոլորիս համար։ Եթե մինչ հիմա չգիտեք, որ զրպարտելու, սուտ տեղեկություններ տարածելու փոխարեն անհրաժեշտ է նախևառաջ կարդալ և ծանոթանալ եղելությանը, ապա կրկին ցավում եմ մեզ բոլորիս համար։ Քանի որ ՀՀ մշակույթի ոլորտը այսօր այնքան վատ վիճակում է, որ ամեն բան կարգավորվում է ֆեյսբուքյան մակարդակում, ապա ժամանակն է հրաժարական տալ և հանձնվել` ոլորտը փոխանցելով պրոֆեսիոնալներին։ Մի պախարակեք մեր մշակույթի գործիչներին, եթե ընդհանրապես տեղյակ չեք շատ կարևոր հարցերից։ Արտիստի գործունեությունը և ստեղծած արժեքները հարատև են, իսկ ձեր աթոռը` ոչ։ Մինչ օրս այդպես էլ ոլորտի ղեկավարները չկարողացան ընդունել, որ ոչ թե պետք է գործեն ընդդեմ տաղանդավոր արտիստների, այլ հանուն ֆունդամենտալ ծրագրերի իրագործման։ Չմոռանաք, որ դուք մշակույթի ոլորտի այսօրվա պատասխանատուն եք, բայց ոչ այն մշակույթի, որը «տիկին Մակունցն» էր, այլ այն մշակույթի, որը ստեղծվել և ստեղծվում է արվեստագետների, սերունդների և հասարակության ունեցած մշակութային պոտենցիալի արդյունքում, իսկ վերջինիս պահպանման և առաջընթանցի համար անհրաժեշտ է իրականացնել ճիշտ և գրագետ մշակութային քաղաքականություն։ Մշակույթի նախարարության երկարամյա աշխատակից