Անանյանի քարտուղարուհուն՝ 2,5 միլիոն, իսկ իր կյանքը վտանգող զինվորականին՝ 50 հազար դրամ

politik.am-ը գրում է. Օրերս հայտնի դարձավ, որ ՊԵԿ նախագահ Դավիթ Անանայանը աննախադեպ շռայլ կերպով պետական միջոցների հաշվին պարգևատրել է իրեն և իր ենթականերին: Անանյանը ինքն իրեն պարգևատրել է 8 մլն 55 000 դրամ, ՊԵԿ նախագահի առաջին տեղակալ Ռաֆիկ Մաշադյանին  9 մլն. 60 000 դրամ, ՊԵԿ աշխատազմի ղեկավարի տեղակալ Էդգար Գևորգյանին  6 մլն. 456 000 դրամ, ՊԵԿ նախագահի խորհրդական, ՀՀ ֆինանսների նախկին նախարար Վարդան Արամյանի գործավարուհի Սաթինե Գզողյանին   2 մլն. 763 000 դրամ (կան նաև այլ միլիոնանոց պարգևատրումներ, ամբողջական ցանկը` այստեղ): Իսկ ահա զինվորականների պարգևատրումները եղել են շատ համեստ։ «Հրապարակ» օրաթերթի հետ զրույցում ՊՆ մամուլի խոսնակ Արծրուն Հովհաննիսյանը ասել է, որ զինվորականները ստացել են 50-250 հազար դրամ։ Փաստորեն, ըստ իշխանությունների, իր կյանքը վտանգող զինվորականը պետք է պարգևատրվի ընդամենը 50 հազար դրամ, իսկ լավագույն զինվորականը՝ 250 հազար դրամ։ Ահա այսպիսին է մեր պետության վերաբերմունքը բանակին։ ՊԵԿ նախագահի քարտուղարուհին, փաստորեն, ըստ իշխանությունների, առավել կարևոր խնդիր է լուծում, քան սահման պահող, իր կյանքը վտանգող զինվորականը։