«Խաղաղության այլընտրանքը կատաստրոֆան է». Զոհրաբ Մնացականյան
Մենք որևէ կերպ չենք շեղվել մեր դիրքորոշումներից, որ ասել ենք, «Եռաբլուր» զինվորական պանթեոնում լրագրողների հետ ճեպազրույցում ասաց ՀՀ ԱԳ նախարար Զոհրաբ Մնացականյանը: Ինձ համար տարօրինակ է, որ խաղաղության նախապատրաստելու մասին հայտարարությունները որոշ շրջանակների մոտ առաջացնում է պարտվողական տրամադրություն,ասաց նախարարը: «Առաջնային խնդիրը մեզ համար կարգավիճակն է ու անվտանգությունը: Մենք աշխատում ենք խաղաղության համար, բայց մեր վճռականությունը չպետք է կասկածի տակ դնել. խաղաղությանն այլընտրանք չկա, խաղաղության այլընտրանքը կատաստրոֆան է»,-ասաց Զոհրաբ Մնացականյանը՝ անդրադառնալով ԼՂ հիմնախնդրի բանակցային գործընթացին: Հարցին՝ ի՞նչ էր նշանակում Ադրբեջանի ԱԳ ղեկավարի հայտարարությունը, թե փոխըմբռնում կա, Մնացականյանի խոսքով՝ փոխըմբռնումն այնքանով է, որ հասկանալի է այն, թե ինչ մոտեցումներ ունի ՀՀ-ն: «Այն, ինչ անում ենք, անում ենք բաց ու թափանցիկ: Չկա որևէ բան, որով շարժվենք առաջ ու հասարակությունը չիմանա, այսինքն՝ հասարակությունից գաղտնի որևէ թուղթ չկա»,- հավելել է ՀՀ արտաքին գերատեսչության ղեկավարը: Անդրադառնալով Արցախը բանակցային կողմ դարձնելու ուղղությամբ քայլերին՝ նշել է. «20 տարի եղել է ձևավորված մեկ ձևաչափ, որտեղ բանակցությունները տեղի են ունեցել բոլորիս հայտնի շրջանակում: Մենք չենք կարող բոլոր պարտավորությունները վերցնել՝ առանց ԼՂ-ի, սա պրակտիկ խնդիր է ու բանակցությունների արդյունավետության համար է»:
Հետևեք մեզ Viber-ում
