Փողոցն ընդդեմ Հայաստանի

Արմավիր քաղաքի ավագանին կալանավորված Մանվել Գրիգորյանին զրկել է Արմավիր քաղաքի պատվավոր քաղաքացու կոչումից: Հիշեցնենք, որ 2018թ. դեկտեմբերի 25-ին Արմավիրի ավագանին կայացած նիստում Մանվել Գրիգորյանին չէր զրկել Արմավիրի պատվավոր քաղաքացու կոչումից, որոշվել է այդ հարցը քննարկել հաջորդ ավագանու նիստի ընթացքում: Ավելի վաղ Մանվել Գրիգորյանին պատվավոր քաղաքացու կոչումից զրկել էր նաեւ հայրենի Էջմիածին քաղաքի ավագանին։ Զարմանալու եւ զայրանալու արդեն ոչինչ չկա, կա խխճալու, եթե կուզեք՝ ողբալու բան, եւ ողբի օբյեկտն էլ մեծ ու փոքր իշխանիկներն են։ Կարելի է փողոցի միջոցով իշխանության գալ, բայց անթույլատրելի է փողոցով արդարադատություն իրականացնել, փողոցով լուծել պետական ինստիտուտների գործառույթները, տուրք տալ փողոցին, կամ ճիշտ հակառակը՝ ամեն ինչ անել հանուն փողոցի, հանուն պոպուլիզմի ու «տեսարանների», որոնք սնում են իշխանությամբ գերված ոչ սթափ զանգվածներին։ Մանվել Գրիգորյանին, այո, նորից կալանավորեցին, բայց դա տեղի ունեցավ ոչ թե Հայաստանի իրավապահ համակարգի արդար դատաքննության արդյունքում, այլ փողոցի ճնշման։ Սակայն մի մոռացեք, որ դեռեւս չկա դատարանի վճիռ ու ապացուցված չէ Մանվել Գրիգորյանի մեղքը։ Միթե կարելի է հիմնահատակ ոչնչացնել պետական ինստիտուտները ու պետական այրերին դարձնել խամաճիկներ, որոնք պատրաստ են ցանկացած գնով սպասարկել էժանագին շահեր։ Իսկ ինչ կանի այդ ավագանին, երբ դատարանը կորոշի, որ Մանվել Գրիգորյանն ամենեւին էլ մեղավոր չէ, թե՞ արդեն որոշվել է գեներալի ճակատագիրը ու ամեն ինչ ընթանում է բնական հունով։ ԴՄՓ-ԴՄՓ-ՀՈւ` սա՞ է ձեր քաղաքական կրեդոն , թե սադիզմը դարձել է մերօրյա հեղափոխականների քաղաքական գործիքը։ Հերիք չէ, որ ծանր հիվանդությամբ տառապող մարդու նկատմամբ Հայաստանի անկախ դատարանը կրկին կալանքի որոշում է կայացնում , դաս չքաղելով Սամվել Մայրապետյանի նկատմամբ ՄԻԵԴ-ի օրերս ընդունված որոշումը, հեղափոխական իշխանությունը որոշել է, որ սրան զուգահեռ պետք է մինչեւ վերջին խազը վարկաբեկել, ստորացնել մարդու, որը հաստատեպս մի շարք արժանիքներով գերազանցում է շատ շատերից, ովքեր օրեր շարունակ փողոցներում պահանջում էին իրեն կալանավորել։ Մենք տեսանք չէ՞, որ ձեր ազատ ու հպարտ քաղաքացիները դոնպիպոններն ու նրանց մերձավորներն են, հենց նրանք էին պահանջում նորից կալանավորել Գրիգորյանին։ Բայց սրանով կարծես թե չեն բավարարում, շոուն պահանջում է նոր անուններ, ու հիմա պահանջ կա նաեւ նման կոչումներից զրկել Սերժ Սարգսյանին, Ռոբերտ Քոչարյանին։ Փողոցը զորավոր է դառնում ու եթե այսօր արշավը մեկ մարդու դեմ է, վաղը լինելու է Հայաստանի դեմ։ Հիշեցնենք, որ Վերաքննիչ քրեական դատարանը մի քանի օր առաջ բավարարեց Գրիգորյանին կալանավորելու՝ դատախազության բողոքը։ Վերաքննիչ դատարանը հունվարի 22-ին որոշեց կրկին կալանավորել Գրիգորյանին` բավարարելով գրավի կիրառումն անթույլատրելի ճանաչելու մասին դատախազության միջնորդությունը։ 2018 թվականի դեկտեմբերի 21-ին գեներալն ազատ էր արձակվել 25 մլն դրամ գրավի դիմաց։Մանվել Գրիգորյանը կալանավորվել է հունիսի 19-ին: Գրիգորյանին մեղադրանք է առաջադրվել ապօրինի կերպով ռազմամթերք ձեռք բերելու եւ իրեն պատկանող առանձնատներում պահելու համար, ինչպես նաեւ՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափի ուրիշի գույք հափշտակելու համար: Անի Սահակյան