Խորիմաստ լռություն՝ կարևորի մասին

Նիկոլ Փաշինյանը հունվարի 22-25-ը ընթացող Դավոսի համաշխարհային տնտեսական համաժողովի թեմատիկ քննարկումներից մեկում հանդես է եկել որպես բանախոս՝ «Ձևավորելով ժողովրդավարության ապագան» խորագիրը կրող թեմատիկ քննարկմանը: Ի պատասխան քննարկումը վարող Մարտին Վոլֆի հարցի` Նիկոլ Փաշինյանը նշել է, որ Հայաստանում մեկ ամիս առաջ տեղի են ունեցել խորհրդարանական ընտրություններ, որոնք գնահատվել են ազատ, ժողովրդավարական և թափանցիկ։ «Եվ հիմա մենք մեծ հաջողություն ենք գրանցել ժողովրդավարության հարցում, բայց մենք նաև մեծ մարտահրավերներ ունենք, ու ամենամեծ մարտահրավերը մեր ժողովրդավարությունը տնտեսապես ամրապնդելն է։ Գիտեք, որ մենք երկար ժամանակ մեծ խնդիր ունեինք՝ կապված ընտրակաշառքի հետ։ Երբ մարդիկ իրենց աղքատության պատճառով ստիպված էին ընտրակաշառք վերցնել։ Իհարկե, հեղափոխությունը մարդկանց ազատեց այդ պարտավորությունից։ Բայց հիմա մենք պետք է մեր քաղաքացիներին ավելի ուժեղ և անկախ դարձնենք տնտեսական առումով։ Գիտեք, որ կա փոքր, միջին բիզնես, բայց մենք պատրաստվում ենք ստեղծել նոր կատեգորիա, ինչպիսին միկրոբիզնեսն է և ազատել նրանց հարկերից՝ հույսով, որ կկարողանանք խրախուսել մեր ժողովրդին, բացատրել մարդկանց, որ ոչ միայն կառավարությունն է պատասխանատու աղքատության հաղթահարման համար, այլ նաև իրենք պետք է ինչ-որ բան անեն։ Մենք ցանկանում ենք խրախուսել մեր ժողովրդին, բայց, իհարկե, նաև ստեղծել իրական հնարավորություններ՝ պայքարելու սեփական աղքատության դեմ։ Այսպիսով, իմ պատասխանն է, որ մեր գլխավոր մարտահրավերը մեր ժողովրդավարությունը տնտեսապես ամրակայելն է, և մենք հույս ունենք ներգրավել նոր օտարերկրյա ներդրումներ, որովհետև մենք կարողացանք պայքարել կոռուպցիայի դեմ, կարողացանք հիմնել իրական օրենքի պահանջներ, և մենք պատրաստվում ենք պարբերաբար պարզեցումներ կատարել ավելի շատ ներդրումներ գրավելու նպատակով»,- նշել է Նիկոլ Փաշինյանը։ Անդրադառնալով Հայաստանում ԶԼՄ-ների գործունեությանն ու մամուլի ազատությանը` Նիկոլ Փաշինյանը նշել է. «Գիտե՞ք, ես իրականում լրագրող եմ, գլխավոր խմբագիր և նախկին քաղբանտարկյալ։ Բայց հիմա կարող եմ ասել, որ Հայաստանում լրատվությունն այժմ ազատ է, քան երբևէ։ Բայց ոչ բոլոր լրագրողներն են համաձայն ինձ հետ, որովհետև կարծում են, որ չափազանցություն է այն միտքը, որ Հայաստանում լրատվությունը լիովին ազատ է, բայց ես կարող եմ պնդել դա։ Եվ գիտեք՝ ես կարծում եմ նորմալ է, որ լրատվամիջոցների և կառավարության կապը պետք է որոշակիորեն լարված լինի, որովհետև տեսնում ենք, որ այժմ ամբողջ աշխարհում ցածր վստահություն կա կառավարության կարողությունների հանդեպ, և դա կարող է կապված լինել այն հանգամանքի հետ, որ այժմ հասարակության բոլոր անդամներն ավելի շատ բան գիտեն բարձրաստիճան պաշտոնյաների մասին, քան նախկինում։ Որովհետև ամեն մանրուք կարող է ազդել մարդկանց հավատի վրա՝ քաղաքական գործիչների, նախարարների հանդեպ և այլն, և այլն»: Նիկոլ Փաշինյանը համոզմունք է հայտնել, որ միայն կառավարությունների լիակատար թափանցիկությունը կբարձրացնի կառավարության նկատմամբ վստահության մակարդակը: Փաշինյանը Դավոսի համաշխարհային համաժողովում իրապես ուներ հնարավորություն խոսելու ոչ միայն ամիսներ առաջ տեղի ունեցած հեղափոխության մասին, այլ՝ կոնկրետ արդեն ներկայացներ, թե ինչ է արել կառավարությունն այս 9 ամիսների ընթացքում և ավելի հստակ՝ ինչ է ծրագրում իրականացնել և ինչպես՝ ապագա մի քանի ամիսներին: Հստակ է, որ Փաշինյանի կառավարությունն այժմ խնդիր ունի ներդրումներ բերել Հայաստան: Դա էին վկայում նաև վերջին երկու օրերին միջազգային հեղինակավոր ընկերությունների ղեկավարների հետ հանդիպումները՝ Դավոսի կուլիսներում: Ինչ փոխվեց իշխանափոխությունից հետո և ուր է գնում նոր Հայաստանը՝ այս հարցի պատասխանները տալիս Փաշինյանը պետք է պատասխաներ նախևառաջ՝ «ինչպես» հարցին, ներկայացներ իր տեսլականը, այսպես ասած՝ գործողությունների ժամկետները, թե այս կամ այն փուլում ինչ է պատրաստվում անել, որպեսզի հասնի կոռուպցիայի վերացմանը: Ասել, որ այդ խնդիրն այլևս լուծված է՝ այդպես չէ, որովհետև դա համակարգային խնդիր է, պահանջում է համակարգային լուծում, ոչ թե առանձին հանցագործությունների բացահայտում և տարբեր չափերի գումարների յուրացման մասին տեղեկատվություններ հրապարակելը: Ինչ վերաբերում է ազատ մամուլի վերաբերյալ պնդումներին, պետք է նաև անդրադառնալ, թե ինչ մթնոլորտում է գործում ազատ մամուլը. ատելության ու հարձակումների ֆոնին, որի ձևավորմանը նպաստեցին հեղափոխության «մարտիկները»: Ինչու չէ՝ որոշ լրատվամիջոցների նկատմամբ իրավապահների իրականացրած կոնկրետ գործողությունները: Այժմ ցանկացած քննադատություն ազատ մամուլի կողմից՝ որակվում է որպես նախկին իշխանության, ՀՀԿ-ի պատվերը կատարելու փաստ: Այս պայմաններում ասել, որ մամուլը Հայաստանում լիովին ազատ է, երբ արդարացված քննադատությանը ոչ թե պատասխանում են ըստ արժանվույն, այլ դրա մեջ «պատվեր» են տեսնում՝ նշանակում է որդեգրել իրական քննադատությունը արհամարհելու քաղաքականություն: Թամար Բագրատունի