Ոստիկանության եւ հանրության հարաբերություններում հսկայական տեղաշարժեր են տեղի ունեցել. Փաշինյան

Ընդհանուր առմամբ կարող եմ ասել, որ ոստիկանությունը կատարում է իր առջեւ դրված խնդիրները, եւ կարող ենք արձանագրել մի քանի արդյունքներ, որոնք տեղի են ունեցել այդ թվում ոստիկանության կարեւոր մասնակցությամբ: Այս մասին, այսօր՝ հունվարի 26-ին, ՀՀ ոստիկանության կոլեգիայի ընդլայնված նիստի ժամանակ նշել է ՀՀ վարչապետ Նիկոլ Փաշինյանը: Նա ներկայացրել է իր դիտարկումները ոստիկանության վերջին ամիսների աշխատանքի վերաբերյալ՝ նշելով. «Առաջին՝ մայիսից այս կողմ Հայաստանում տեղի ունեցած ընտրությունների եւ ընտրական գործընթացների բացառիկ որակը, եւ պետք է արձանագրեմ, որ այս հարցում իսկապես ոստիկանությունը շատ կարեւոր դերակատարում է ունեցել, մասնավորապես, ընտրակաշառքների մեխանիզմի հնարավոր կանխարգելման գործում: Մենք չգիտենք՝ 100 տոկոսով ենք այդ խնդիրը լուծել, թե ոչ, բայց որ որպես համակարգային պրոբլեմ մեզ հաջողվել է հաղթահարել ընտրակաշառքի միջոցով եւ ընդհանրապես ընտրական գործընթացում քաղաքացիների կամքի աղավաղումը, դա փաստ է եւ այդտեղ ոստիկանության դերը չափազանց մեծ է: Երկրորդ՝ ոստիկանության զորքերի ծառայությունը աջակցությունը Հայաստանի զինված ուժերին պետական սահմանի պահպանության գործում: Ես սա իսկապես համարում եմ հեղափոխական նշանակության փոփոխություն եւ ուզում եմ եւս մեկ անգամ հատուկ շնորհակալություն հայտնել ոստիկանության զորքերին, այն ծառայողներին, ովքեր ստանձնել են հայրենիքի սահմանները պաշտպանելու, պահպանելու այդ կարեւոր պարտականությունը: Կարծում եմ, որ ոստիկանության եւ հանրության հարաբերություններում հսկայական տեղաշարժեր են տեղի ունեցել, եւ հանրության վերաբերմունքը նաեւ այս գործընթացների արդյունքում կարող ենք գնահատել որպես դրական»: