Արտակարգ իրավիճակ Լոռու մարզում . ՖՈՏՈՌԵՊՈՐՏԱԺ

Արդեն մի քանի ժամ է՝ արտակարգ իրավիճակ է ստեղծվել Լոռու մարզում: Ինչպես դեպքի վայրից հայտնում է ֆոտոլրագրող Գագիկ Շամշյանը, Վանաձոր-Ալավերդի ավտոճանապարհի Վահագնաձոր գյուղի վարչական տարածքում գտնվող Շահալի կայարանին հարակից անտառում խոշոր հրդեհ է բռնկվել: Կրակի տարածման դեմ կենացմահու պայքար են տանում Լոռու մարզի փրկարարները, ոստիկանները, «Հարավկովկասյան երկաթուղի» ընկերության ծառայողները և մեծ թվով գյուղացիներ: Կրակին մոտենալը բավականին դժվար է, սակայն հրշեջ-փրկարարներն ու քաղաքացիները երբեմն վտանգելով իրենց կյանքը, ամեն գնով մոտենում են կրակի օջախներին, որպեսզի նախ կանխեն տարածումը, ապա մարեն այն: «Հարավկովկասյան երկաթուղու» ծառայողները գնացքով ջուր են մոտեցնում հրշեջներին: Լոռու մարզի ոստիկանության պետ Արամ Ղազարյանի հանձնարարականով տեղում ուժեղացված ծառայություն են կատարում մարզի ոստիկաններն ու Վանաձոր քաղաքի ոստիկանության Գուգարքի բաժնի օպերատիվ խմբերը: Ֆոտոլրագրողը հայտնում է, որ իրավիճակին տեղում օնլայն եղանակով հետևում է Արտակարգ իրավիճակների նախարար Ֆելիքս Ցոլակյանը և այստեղ ասում էին, որ չի բացառվում, որ նախարարը նույնպես ժամանի դեպքի վայր: Ժամանել է նաև Լոռու մարզպետ Անդրեյ Ղուկասյանը: Թե ինչն է եղել կրակի պատճառը, դա պարզ կլինի մի շարք փորձաքննություններից հետո: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները՝ Գագիկ Շամշյանի