Թաթան արտոնյալ չէ. Դավիթ Անանյան (video)

Այսօր՝ հունվարի 24-ին, լրագրողների հետ ճեպազրույցում ՊԵԿ նախագահ Դավիթ Անանյանը՝ անդրադառնալով այն հարցին, թե ճի՞շտ է, որ ինքն ասել է՝ «Թաթային ձեռք չտաք՝ նա մերն է», ասաց. «Թաթան համազգային է, նա ոչ միայն մերն է, այլ բոլորինն է, բայց եթե դուք կարծում եք, որ ինքն ավելի արտոնյալ է մյուսների համեմատ հարկեր վճարել-չվճարելու առումով՝ ո՛չ, այդպիսի հայտարարություն չի եղել և չի կարող լինել, ոչ ոք արտոնյալ չէ»: Դիտարկմանը, թե ՊԵԿ աշխատակիցները այցելե՞լ են ռեստորաններ և ուսումնասիրե՞լ են, թե երգիչներն ինչ եկամուտներ ունեն, Անանյանը պատասխանեց, որ, այո՛, այցելել են, և եթե այդ սրահներում եղել են հավաքույթներ, իրենք սահմանված կարգով ձևակերպեն այդ անձանց աշխատանքը: «Այո, ընթացիկ հսկողական գործառույթներ իրականացնում են մեր աշխատակիցները, այդ թվում նաեւ այցելում եմ ռեստորանային համալիրներ եւ հորդորում են, որ եթե լինում են հավաքույթներ, իրենք սահմանված կարգով ձեւակերպեն այդ անձանց աշխատանքը: Դրանք հորդորի տեսքով են լինում: Այո, մենք ուզում ենք, որ շոու-բիզնեսը հարկվի: Բայց, շոու-բիզնեսից էլ ենք նման ազդակներ ստանում, իրենք էլ դեմ չեն, որ դա լինի: Կարծում եմ, պետք է քննարկումներ ունենանք եւ իրենց ուղղորդենք այն ճիշտ ճանապարհը, որ պետք է իրականացնեին դեռեւս տարիներ առաջ»,-ասաց Անանյանը: Նա նշեց, որ հայտարարագիր ներկայացնելու վերջնաժամկետը մինչեւ մարտի 15-ն է. «Մարդիկ դեռ ունեն ժամկետ»: