Կկառուցվի մետրոյի 2 կայարան և ճոպանուղի. Արթուր Մեսչյանը մանրամասնում է

Նախատեսվում է Երևանի մետրոպոլիտենի երկու կայարան կառուցել։ Այս մասին այսօր՝ հունվարի 24-ին, մամուլի ասուլիսի ժամանակ իր պաշտոնավարման 100 օրն ամփոփելիս, նշեց Երևանի գլխավոր ճարտարապետ Արթուր Մեսչյանը։ «Շահագրգիռ կողմերը մտադիր են նախագծային փաթեթ ներկայացնել կառավարություն՝ Երևանի մետրոպոլիտենի նոր կայարանների կառուցման վերաբերյալ։ Սակայն դրա մեջ չեն լինելու գնացքների ուղղությունները և այլն, քանի որ այդպիսի նախագիծ արդեն կա, դրա իրականացման վրա արդեն ծախսվել է շուրջ 250 միլիոն դոլար, և այդտեղ փոխելու բան չկա։ Մենք չենք ուզում տարածվել և ապագա զարգացման տենդենցի մեջ նայել այս խնդիրը, որովհետև ֆինանսական բավականին մեծ ծախսեր են՝ կապված այդ կառույցի հետ: Մենք ուզում ենք սահմանափակվել ամենաստրատեգիական գծով՝ քաղաքը կապենք Աջափնյակի հետ, հետագայում դա կշարունակվի Դավթաշեն, բայց դա կլինի մի փոքր հետո»,-ասաց Մեսչյանը։ Նա նշեց, որ կան ու կգտնվեն ներդրողներ, որոնք կօգնեն գումարային տեսանկյունից, ու հավանաբար դրա դիմաց քաղաքապետարանը նրանց հնարավորություն կտա մասնակցել բնակելի տների կառուցման աշխատանքներին, որոնցից մոտ մեկ տոկոս կտան մետրոյին և այլն։ Մեսչյանն անդրադարձավ ճոպանուղու կառուցման ծրագրին, որը պետք է կապի Նոր Նորքը քաղաքի կենտրոնի հետ. «Նորքի մասիվը ճոպանուղիով կկապվի քաղաքի կենտրոնի հետ։ Այս նախագիծն ավելի արագ կիրականացվի, քան՝ մետրոյի կայարան կառուցելը, քանի որ ավելի համեստ ծախսեր է պահանջում»: