«Իմ քայլ»-ի պատգամավորի բազում սխալներով գրությունից նախկին մարզպետը նեղվել է

Շիրակի նախկին մարզպետ ՀՅԴ-ական Արթուր Խաչատրյանը այսօր իր ֆեյսբուքյան էջում գրել էր․ «Սոֆյա Հովսեփյան կոչված նորելուկ պատգամավորն ինձ, ի թիվս այլոց, մեղադրել է Շիրակի մարզն ավերելու մեջ»։ Նախկին մազպետը գրառման սկզբում նշել է, որ ժամանակ չունի և այդ է պատճառը, որ չի դիմում դատարան և կոչ է անում, նորընտիր պատգամավորին փաստեր ներկայացնել դատախազություն: Նա մասնավորապես նշել էր. «Այսօր Սոֆյա Հովսեփյան կոչված նորելուկ պատգամավորն ինձ, ի թիվս այլոց, մեղադրել է Շիրակի մարզն ավերելու մեջ: Եթե հավես ունենայի գլուխ դնել, դատի կտայի զրպարտության համար: Բայց եթե ինքը փաստեր ունի, թող դիմի դատախազություն: Ուրախ կլինեմ հետը դատարանում հանդիպել: Հա, մեկ էլ, եթե այդքան քաջ էիր, ինչու՞ դրա մասին ինձ չէիր ասում, փոխարենը պատիվ էիր համարում, որ քեզ ընդունում էի»: Իսկ գրառմանը կից լուսանկարում ներկայացված է «Իմ քայլը» դաշինքի պատգամավորի գրածից միայն մի հատված. «Իբր որ ՀՅԴ ասում էր ու թալանում անողոք կերպով ինչ էր տալիս երկրին. Մի հատ խնդրում եմ սթափ նայեք. Ինձ մի դիտարկել, որպես գործիչ, այլ ուղղակի Սոֆյա ու բերեք ազնիվ նայենք, այն ինչ մեր երկրում քանդել էր ՀՅԴ-ն ՀՀԿն չէր էլմպատկեևացնի , մեր մարզը կոնկրետ ավերել են տարիներ շարունակ»: Գրառման բազում վրիպակներից այնքան էլ հասկանալի չէ բուն միտքը և դժվար է նաև հասկանալ, թե ով է հասցեատերը: Թե ինչպես է Խաչատրյանը հասկացել, որ իրեն է վերագրվում տեքստը, 5 անգամ ընթերցելուց հետո էլ չկարողացանք հասկանալ։ ArmDaily.am-ը զրուցել է նաև «Իմ քայլը» դաշինքի պատգամավոր Սոֆյա Հովսեփյանի հետ: Նա ասաց, որ Խաչատրյանը իր գրառումից միայն մի հատված է մեջբերել, որում Խաչատրյանի անունը նշված չէ: Հստակեցրեց, հարգում է Արթուր Խաչատրյանի անձը, սակայն ասաց, որ հավանբար Խաչատրյանին ձեռնտու էր հենց այդ հատվածը ներկայացնելը: Պատգամավորը նշեց, որ Արթուր Խաչատրյանի հետ հարաբերություններում խնդիրներ չկան. «Տեղի ունեցածը համարում եմ բանավեճի ընթացքում սրացում, որից հետևություններ պետք է անենք և ես, և Արթուր Խաչատրյանը»,- ArmDaily.am-ի հետ զրույցում հավելեց Սոֆյա Հովսեփյանը: