Սեդրակ Քոչարյանի պահանջը Արթուր Վանեցյանից

Նիստին հայցվորի ներկայացուցիչ Անի Ալավերդանը միջնորդեց, որպեսզի Արթուր Վանեցյանը դատարանում ցուցմունք տա։ Պատասխանող կողմի ներկայացուցիչը նշեց, որ առարկում է միջնորդության դեմ։ Հիշեցնենք՝ ՀՀ Երկրորդ նախագահի որդին՝ Սեդրակ Քոչարյանը հայց է ներկայացրել ԱԱԾ պետ Արթուր Վանեցյանի դեմ՝ պահանջելով «փոխհատուցել զրպարտության դիմաց և հրապարակայնորեն հերքել» 2018 թվականի սեպտեմբերի 11-ին մամուլի ասուլիսի ժամանակ Վանեցյանի հայտնած այն միտքը, թե «Ռոբերտ Քոչարյանը 6 միլիոն դոլար կաշառք պահանջելով՝ դարձել է «Կոնգրես» հյուրանոցի բաժնետեր»: Դատավոր Աիդա Դավթյանը որոշեց մերժել միջնորդությունը։ Կողմերն այլ միջնորդություններ չունեին։ Նշենք, որ ոչ Քոչարյանը, ոչ էլ Վանեցյանը նիստին ներկա չեն։ Նախքան դատական նիստը սկսելը դատավորը կողմերին հարցրեց, թե արդյոք կո՞ղմ են, որ վեճը լուծվի հաշտությամբ: Սեդրակ Քոչարյանի շահերի ներկայացուցիչ Անի Ալավեդյանը հայտարարեց, թե հաշտությանը դեմ չեն, եթե պատասխանող կողմը հերքի տեղեկությունները, որոնք հրապարակվել են մամուլի ասուլիսի ժամանակ: Արթուր Վանեցյանի ներկայացուցիչ Վահագն Գրիգորյանն էլ ասաց, թե չեն կարող հաշտվել, քանի որ հայցվոր կողմը հաշտությունը տեսնում է միայն հայցի բավարարման ձևով: Վանեցյանի հնչեցրած արտահայտությունները չեն վերաբերում Սեդրակ Քոչարյանին։