ԱԺ նախագահ Արարատ Միրզոյանի ընտանիքը (Photo)

Այսօր Ազգային ժողովում փակ գաղտնի քվեարկության արդյունքներով խորհրդարանի նախագահ ընտրվեց միակ թեկնածուն՝ «Իմ քայլը» դաշինքից առաջադրված Արարատ Միրզոյանը: Wnews.am-ը ներկայացնում է ԱԺ նորընտիր նախագահին եւ իր ընտանիքը. Արարատ Սամվելի Միրզոյանը ծնվել է 1979 թվականի նոյեմբերի 23-ին Երեւանում: Միրզոյանը պատմաբան է, պատմական գիտությունների թեկնածու:Սովորել է Երեւանի պետական համալսարանի պատմության ֆակուլտետում, այնուհետեւ ՀՀ պետական կառավարման ակադեմիայում: 2003-2005 թվականներին աշխատել է ՀՀ ԳԱԱ Հայոց ցեղասպանության թանգարան-ինստիտուտում, 2005-ից 2007-ը՝ Հայաստանի ազգային արխիվի հասարակական-քաղաքական փաստաթղթերի բաժնում՝ որպես գլխավոր արխիվագետ: 2004 թվականին Միրզոյանը մի խումբ երիտասարդ գիտնականների եւ ուսանողների հետ նախաձեռնել ու ակտիվ մասնակցել է «Հանուն գիտության զարգացման 1» շարժմանը: 2007-2010 թվականներին Արարատ Միրզոյանը եղել է «HSBC Բանկ Հայաստան» ՓԲԸ մասնագետ, մեկ տարի անց՝ «Ռեգնում» միջազգային լրատվական գործակալության վերլուծաբան: 2012 թվականից մեկ տարի դասավանդել է Երեւանի պետական համալսարանում: 2013 թվականի նախագահական ընտրություններից հետո համալսարանը չի երկարեցրել Միրզոյանի հետ կնքած աշխատանքային պայմանագիրը: Ինչպես նշվում է տարբեր աղբյուրներում՝ պատճառը եղել է այն, որ Արարատ Միրզոյանը քննադատել ու դատապարտել է բողոքի ակցիաներ եւ դասադուլներ անող ուսանողների շարժմանը խոչընդոտած ԵՊՀ պաշտոնայներին: 2012-2013 թվականներին եղել է Ընտրական համակարգերի միջազգային հիմնադրամի (IFES) ընտրողների իրազեկման ծրագրի համակարգող, 2013-2015 թվականներին՝ «Հայաստանի զարգացման նախաձեռնություններ» (IDEA) հիմնադրամի «Ավրորա մրցանակ եւ 100 կյանք» նախաձեռնության հետազոտական խմբի ղեկավար: 2014-2017 թվականներին Միրզոյանը եղել է Բազմակուսակցական ժողովրդավարության նիդեռլանդական ինստիտուտի (NIMD) քաղաքական կուսակցությունների եւ ռազմավարական պլանավորման փորձագետ: Հայաստանյան եւ միջազգային մամուլում տպագրված բազմաթիվ վերլուծությունների հեղինակ է: Միրզոյանը Քաղաքացիական պայմանագիր կուսակցության հիմնադիր անդամ է, իսկ 2016 թվականից՝ ՔՊ կուսակցության վարչության անդամ: 2016 թվականի ապրիլյան դեպքերի ժամանակ կամավոր մեկնել է՝ մասնակցելու սահմանի պաշտպանությանը: Պարգեւատրվել է ՀՀ ՊՆ պատվոգրով: 2017 թվականին ընտրվել է ՀՀ վեցերորդ գումարման Ազգային ժողովի պատգամավոր՝ ԵԼՔ կուսակցությունների դաշինքի ցուցակով: 2018 թվականի մարտի 31-ից նախաձեռնել եւ մասնակցել է #ԻմՔայլը շարժմանը: Շարժման հաղթանակից հետո՝ 2018 թվականի մայիսի 11-ին նշանակվել է Հայաստանի Հանրապետության առաջին փոխվարչապետ: Արարատ Միրզոյանն ամուսնացած է, ունի մեկ դուստր եւ մեկ որդի՝  10–ամյա Արփին եւ 7–ամյա Սամվելը։ «Երկու երեխաներս էլ շատ նման են ինձ։ Իհարկե, կինս այլ կարծիք ունի։ Բնավորությամբ տղաս, երբեմն, կնոջս պես հախուռն է, աղջիկս` հավասարակշռված, հարցերին համակողմանի նայող։ Այս առումով շատերն աղջկաս ինձ են նմանեցնում, որդուս` կնոջս»,- հարցազրույցներից մեկում ասել է Արարատ Միրզոյանը։ Իր կնոջ՝ Գոհար Աբաջյանի հետ ծանոթացել է 2004թ.-ին՝ ուսանողների և երիտասարդ գիտնականների շարժմանը: Արարատ Միրզոյանն այդ շարժման նախաձեռնողներից և հիմնական համակարգողներից էր, իսկ Գոհարն էլ  համակարգող խմբի մի քանի այլ անդամների համակուրսեցին էր: «Այդ ընթացքում ծանոթացանք, հետո դարձանք ընկերներ, այդ թվում՝ Գոհարի հետ, բայց նա ինձ համար հենց սկզբից էլ պարզապես ընկեր չէր: Գոհարի սիրտը գրավելն իրականում շատ դժվար գործ էր և ես դեռ գրավում եմ նրա սիրտը: Կարծում  եմ՝ զգացմունքն այնպես չէ, որ մի անգամ գալիս և այդպես մնում է, այդ զգացմունքն անընդհատ պետք է սնվի երկկողմանի»,- ասել է ԱԺ նորընտիր նախագահը։