Փաշինյանը խաբել է ընտրողներին․ ՀՀԿ խոսնակ

Ինչպես եւ սպասվում էր, Նիկոլ Փաշինյանը նախընտրական քարոզարշավի ժամանակ խաբել է Ալավերդու ընտրողներին։ Այս մասին NEWS.am-ի թղթակցի հետ զրույցում հունվարի 18-ին հայտարարել է Հայաստանի հանրապետական կուսակցության մամուլի քարտուղար Էդուարդ Շարմազանովը՝ մեկնաբանելով այն տեղեկատվությունը, որ 2019թ․ գարնանը Հայաստանից «Ալավերդու պղնձաձուլական գործարանի» նախկին աշխատակիցների մեծ արտագաղթ է սպասվում։ Նրա խոսքով, այժմ, երբ, Հանրապետական կուսակցությունը իշխող ուժ չէ, ողջ պատասխանատվությունն ընկած է Նիկոլ Փաշինյանի քաղաքական թիմի վրա։ «Առաջարկում եմ Փաշինյանին նորից գնալ Ալավերդի եւ կրկնել այն հայտարարությունը, որ գործարանը («Ալավերդու պղնձաձուլական գործարանը»-խմբ․) աշխատելու է։ Գործարանի փակման ծանր հետեւանքների մասին մեր կուսակցությունը ասում էր վերջին 9 ամիսների ընթացքում։ Ի պատասխան հնչում էին մտքեր այն մասին, որ Շարմազանովը իր կողմն է ուզում գրավել գործարանի ընդդիմադիր տրամադրություն ունեցող աշխատակիցներին։ Այժմ իշխանությունն իրենց ձեռքում է, թող լուծեն 630 մարդու աշխատանքի տեղավորման խնդիրը»,- ընդգծել է նա։ «Ալավերդու պղնձաձուլական գործարանի» նախկին աշխատակիցների արտագաղթը կհանգեցնի մուլտիպլիկատիվ արդյունքի։ «Այն բանի արդյունքում, որ ավելի քան 600 ընտանիքներ փող չեն ստանա, կկրճատվի քաղաքի դրամաշրջանառությունը, ինչը բացասաբար կանդրադառնա Ալավերդու սոցիալ-տնտեսական վիճակի վրա ընդհանրապես»,- եզրափակել է Շարմազանովը։