Վստրեչի Ապերի գործը կարճվեց

Երևան քաղաքի ընդհանուր իրավասության դատարանի դատավոր Մեսրոպ Մակյանը որոշում կայացրեց Արամ Վարդանյանի (Վստրեչի Ապերի) նկատմամբ հարուցված քրեական գործի վարույթը կարճել։ ՀՀ ԱԺ կողմից 2018 նոյեմբերի մեկին ընդունված Էրեբունի-Երևանի հիմնադրման և ՀՀ առաջին հանրապետության հռչակման 100-ամյակի կապակցությամբ քրգործերով համաներում հայտարարելու մասին ՀՀ օրենքի 2-րդ հոդվածի 5-րդ մասի 2-րդ կետի հիմքով՝ Արամ Վոլոդյայի Վարդանյանի նկատմամբ ՀՀ քր. օրենսգրքի 131 հոդվածի 2-րդ մասի առաջին երկու կետերով և Գարեգին Լևոնի Իսկանդարյանի նկատմամբ՝ ՀՀ քր. օրենսգրքի 131 հոդվածի 2-րդ մասի առաջին երկու կետերով հարուցված քրեական հետապնդումը դադարեցնել և քրեական գործի վարույթը կարճել։ Արամ Վոլոդյայի Վարդանյանի և Գարեգին Լևոնի Իսկանդարյանի նկատմամբ որպես կալանավորման այլընտրանքային խափանման միջոց ընտրված գրավը վերացնել, իսկ գրավի գումարները օրինական հիմքերի առկայության դեպքում վերադարձնել գրավատուներին։ Վարդանյանի պաշտպան Լուսինե Սահակյանը հրաժարվեց այլ տեղեկություն տրամադրել՝ նշելով, որ դռնփակ դատական նիստ է անցկացվել։ Հիշեցնենք, որ հունիսի 4-ին, ոստիկանության կազմակերպված հանցավորության դեմ պայքարի գլխավոր վարչությունում Մամիկոն Բագրատունին հաղորդում էր տվել, որ 2017 թվականի հուլիսի 17-ին Նորագավիթ թաղամասում մի սուպերմարկետի մոտից «Վստրեչի ապեր» մականվամբ Արամ Վարդանյանը և մի խումբ անձինք, նախնական համաձայնությամբ, բռնություն գործադրելով առևանգել են իրեն, տեղափոխել Վարդանյանին պատկանող Արցախի փողոցի մի շինություն, տևական ժամանակ իր կամքին հակառակ պահել այնտեղ, ծեծի ենթարկել ու մարմնական վնասվածքներ պատճառել։