ՊԵԿ-ը հետ է կանգնում իր որոշումից

ՀՀ Պետական եկամուտների նախագահ Դավիթ Անանյանը, անդրադառնալով Հայաստանի ռեստորանների կողմից բարձրաձայնված այն խնդրին, որ շրջանառության հարկի բարձրացումը լրացուցիչ խնդիրներ է ստեղծում ռեստորանային բիզնեսի զարգացման համար, որի հետևանքով իրենք ևս կարող են բարձրացնել մատուցվող ծառայությունների գները, նշեց, որ իրենք գործընկերներին հնարավորություն են տվել, որպեսզի իրենք ոլորտի մյուս տնտեսվարողների հետ քննարկումների արդյունքում բերեն ոլորտի միասնական դիրքորոշումը: Հիշեցնենք, որ 2018թ. հուլիսի 1-ից արտոնագրային վճարը փոխարինվել էր 6 տոկոս շրջանառության հարկով, իսկ այս տարվանից սկսած՝ Հարկային օրենսգրքով սահմանված է, որ 6 տոկոսին գումարվում է ևս 2 տոկոս շրջանառության հարկ, այսինքն՝ ռեստորաններն ընդհանուր պետք է վճարեն 8 տոկոս շրջանառության հարկ, իսկ 2020թ. 8 տոկոս շրջանառության հարկին ավելանալու է ևս 2 տոկոս, այսինքն՝ հաջորդ տարի ռեստորանները վճարելու են 10 տոկոս։ Խոսելով այս հարկումից, պարոն Անանյանը տեղեկացրեց, որ  շրջանառության հարկի 10 տոկոսի բարձրացումը կիրառվի ոչ թե 2020 թվականին, այլ, օրինակ՝ մի քանի տարի հետո, այն պայմանով, որ կստեղծվի այնպիսի իրավիճակ, երբ գնումների գործընթացն ավելի պատշաճ կփաստաթղթավորվի։ «Որոշակի ժամանակահատված է պետք, որպեսզի մենք բիզնեսի հետ միասին գնահատենք, թե որն է այն տրամաբանական ժամանակահատվածը, որի շրջանակներում կձևավորենք փաստաթղթավորված գործառույթներ»,- ասաց Դավիթ Անանյանը։