Որ ուժից է դավաճանը

Ավարտվեց Ազգային ժողովի փոխնախագահների ընտրությունը, որոնց արդյունքները ուշագրավ են: Այսպիսով՝ Իմ Քայլը դաշինքից առաջադրված երկու թեկնածուներն էլ՝ Լենա Նազարյանը, Ալեն Սիմոնյանը ընտրվել են , սակայն առաջինի օգտին քվեարկել է 124 եւ 3 դեմ պատգամավոր, իսկ Ալեն Սիմոնյանի օգտին 109 եւ 20 դեմ քվե է գրանցվել:Անշուշտ, չի կարելի պնդել, որ Ալեն Սիմոնյանը կամ Լենա Նազարյանը դեմ ձայները ստացել են ընդդիմադիր գործընկերներից, արդեն ակնհայտ է, որ իշխող ուժում թեւեր են ձեւավորվել ու մեծ է հավանականությունը, որ այս քվեարկության պատկերը նրանց փոխհարաբերության արտացոլումն է: ԱԺ ղեկավարների հարցում, անշուշտ, գլխավոր ընտրիգը թաքնված էր երրորդ՝ ընդդիմադիր փոխնախագահի առաջադրման եւ ընտրության մեջ։ Այստեղ երեկվանից կենաց-մահու պայքար էր ընթանում ընդդիմադիր երկու խմբակցությունների՝ ԲՀԿ-ի եւ «Լուսավոր Հայաստանի» միջեւ։ Նրանք իշխանությանը մի կողմ թողած ընկել էին իրար ջանին եւ փորձում էին ապացուցել, որ հենց իրենք են ընդդիմություն ու հենց իրենց թեկնածուն պետք է դառնա ԱԺ այն ընդդիմադիր փոխնախագահը, որի մասին սահմանում է Սահմանադրությունը: ԲՀԿ-ն առաջադրել էր Վահե Էնֆիաջյանի թեկնածությունը, ԼՀԿ-ն՝ Մանե Թանդիլյանի։ «Իմ քայլը» որոշում ուներ միասնաբար աջակցել ԲՀԿ թեկնածուին, քանի որ իրենց տրամաբանությամբ ու բացատրությամբ մեծությամբ երկրորդ ուժն է եւ ժողովուրդն արդեն իսկ կատարել է այդ ընտրությունը։ Թանդիլյանն ու նրա կողմնակիցներն իրենց ելույթներում փորձեցին ապացուցել, որ իրենք են այս խորհրդարանի իրական եւ ուժեղ ընդդիմությունը, եւ որ պետք է իրենց թեկնածուն ընտրվի ԱԺ փոխնախագահ, ԲՀԿ-ն էլ Թանդիլյանին հիշեցրեց նրա սկզբունքների եւ դիրքորոշումների փոփոխականության մասին։ Ինչեւէ, երկարատեւ այս առճակատումը մեծ հաշվով արդյունք չտվեց: ԱԺ 3-րդ փոխնախագահի պաշտոնում, ըստ քվեարկության արդյունքների, ընտրվել է ԲՀԿ-ից Վահե Էնֆիաջյանը, որին կողմ է քվեարկել 108 պատգամավոր: Սակայն ուշագրավ է, որ Մանե Թանդիլյանին կողմ է քվեարկել 19 թեկնածու, Լուսավոր Հայաստանը խորհրդարանում ունի 18 պատգամավոր, հետեւաբար Մանե Թանդիլյանի օգտին քվեարկած մեկ պատգամավորը կամ ԲՀԿ-ից է, կամ Իմ Քայլը դաշինքից: Քվեարկույթյունից հետո այս ուժերում որս է սկսվել, փորձում են պարզել՝ ով է դավաճանը: Նկատենք, որ ԱԺ ղեկավար կազմի ընտրությունը կաթվածահար է արել ԱԺ նիստերը, կամ նոր իշխանությունները այն հարմարեցնում են իրենց ճաշակին: Հայտարարվեց, որ ժամը 11:00-12:00-ն ընկած ժամանակահատվածում պետք է անցկացվեր քվեարկություն և ընտրվեր ընդդիմադիր փոխխոսնակները: Նիստը պետք է վերսկսվեր 12.00-ին, սակայն տեղի ունեցավ 12.42-ին: Պատճառաբանեցին, թե հաշվիչ հանձնաժողովը ամփոփում է քվեարկության արդյունքները: Ըստ կանոնակարգի՝ անկախ նրանից՝ հաշվվել են քվեարկության արդյունքները, թե ոչ, ԱԺ նիստը պետք է շարունակվի: Անի Սահակյան